ពីថ្ងៃ១១ដល់១៧មករា ២០១៩ ត្រីធ្វើប្រហុក- ផ្អក ត្រូវសំបូរម្តងទៀត

 

ភ្នំពេញ៖ លោក អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជល​ផល បានឲ្យដឹងថា ដោយ គន្លងដាយនៅតាមដងទន្លេសាបក្នុងភូមិសាស្ត្ររាជធានីភ្នំពេញ និងខេត្តកណ្តាលអាចនេសាទត្រីបានច្រើនហើយ ចាប់ពីថ្ងៃទី១១ ខែមករា រហូតដល់ថ្ងៃទី១៧ ខែមករា ឆ្នាំ២០១៩ បន្ទាប់ពីបានពិនិត្យស្ថានភាពទឹកក្នុងបឹងទន្លេសាបយ៉ាងដិតដល់។ នេះបើយោងតាមសេចក្តីជូនដំណឹងរបស់ របស់រដ្ឋបាលជលផល កាលពីថ្ងៃទី៨ ខែមករា ឆ្នាំ២០១៩ផងដែរ ។

លោកប្រធានរដ្ឋបាលជល​ផល ក៏បានអញ្ជើញប្រជាពលរដ្ឋរួសរាន់ទៅទិញត្រីធ្វើប្រហុក ផ្អក ត្រីឆ្អើរ។ល។ សម្រាប់ទុកបរិភោគប្រចាំឆ្នាំ។ លោកប្រធានរដ្ឋបាលជលផល ក៏បានអំពាវ​នាវ​ដល់អាជ្ញាធរមូលដ្ឋាន សមត្ថកិច្ចគ្រប់ជាន់ថ្នាក់មេត្តាបង្កលក្ខណៈងាយស្រួល​ជូនដល់ប្រ​ជាពល​រដ្ឋបានធ្វើដំណើរទៅមក ស្នាក់នៅ និងដឹកជញ្ជូនផលិតផលត្រីកុំឲ្យមានការ​រាំង​ស្ទះតាមការគួរ។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ធ្លាប់បានអះអាងថា ការប្រមូលផលត្រីសម្រាប់ធ្វើប្រហុក ផ្អកនៅឆ្នាំនេះអាចបានច្រើនជាងបណ្តាឆ្នាំកន្លងទៅ ព្រោះតែឆ្នាំនេះទឹកបានធំតាំងពីដើមឆ្នាំដែលអាចឲ្យត្រីបំលាស់ទីពងកូនបានច្រើនកន្លែង។

ជាការកត់សម្គាល់ក្នុង ភូមិសាស្ត្រតាមបណ្តោយដងទន្លេសាបក្នុងស្រុកពញាឭខេត្តកណ្តាល និងរាជធានីភ្នំពេញ ជាកន្លែងដាក់ដាយចាប់យកត្រីនោះ គឺជាទីតាំងប្រមូលផ្តុំមួយសម្រាប់​ប្រជាពលរដ្ឋនាំគ្នាមកទិញត្រីធ្វើប្រហុក ផ្អក ក្នុងអំឡុងចុងខែធ្នូ និងដើមខែមករា ២០១៩ ដែលជាពេលមួយត្រីចាប់ផ្តើមបំលាស់ទីចេញពីបឹងទន្លេសាប ។ ដូច្នេះប្រជាពលរដ្ឋដែលមាន បំណងធ្វើប្រហុក ផ្អក គួររួសរាន់ទៅធ្វើ ប្រហុក ផ្អក តាមកាលពេលវេលាដូចប្រកាស​ជូន​ដំណឹងដូចខាងលើកុំបីខាន៕ ប្រសើរ

Leave a Reply

Your email address will not be published. Required fields are marked *