ភ្នំពេញ ៖ លោក ហោ ស៊ឹមលាង អគ្គនាយកក្រុមហ៊ុន SLN Meat Supply ដែលជាក្រុមហ៊ុននាំចូលគោអូស្ត្រាលីមកកាប់យកសាច់នៅកម្ពុជានោះ បានបដិសេធទាំងស្រុងចំពោះព័ត៌មាន ថា បិទទ្វារការនាំចូលគោអូស្រ្តាលី បន្ទាប់ពីមានព័ត៌មានមួយចំនួនផ្សព្វផ្សាយថា ក្រុមហ៊ុនសាច់គោអូស្ដ្រាលីគ្រោង នឹងបិទទ្វារនាពេលឆាប់ៗខាងមុខនោះ។
លោក ហោ ស៊ឹមលាង បានថ្លែងប្រាប់បណ្ដាញសារព័ត៌មានមួយ នៅថ្ងៃទី២៥ ខែមីនា ឆ្នាំ២០១៧ នេះថា“…ចំពោះព័ត៌មួយចំនួនដែលបានចុះផ្សាយថាក្រុមហ៊ុន គ្រោងនឹងបិទទ្វារនាពេលឆាប់ៗនេះ គឺជាព័ត៌មានមិនពិត…ការពិតទៅក្រសួងកសិកម្ម រុក្ខាប្រមាញ់និងនេសាទ គ្រាន់តែណែនាំនិងជួយជម្រុញឲ្យក្រុមហ៊ុន ពន្លឿនការនាំចេញសាច់គោអូស្ដ្រាលីទៅបណ្ដាប្រទេសកាន់តែច្រើនឡើងៗតែប៉ុណ្ណោះ…”។
លោកថា សម្រាប់ទីផ្សារការលក់សាច់គោអូស្ដ្រាលីនៅកម្ពុជា គឺដំណើរការទៅដោយរលូន ប៉ុន្ដែដោយសារតែទីផ្សារនៅកម្ពុជាតូចពេកដូច្នេះ យើងត្រូវនាំចេញទៅបណ្ដាប្រទេសបន្ថែមទៀត។
លោកបន្ដថា ទីផ្សារកម្ពុជាមានប្រមាណតែ៥-១០ភាគរយ ប៉ុណ្ណោះ ចំណែកឯកទីផ្សារនៅក្រៅប្រទេសវិញ គឺមានរហូតដល់៩០ភាគរយ។ សព្វថ្ងៃនេះយើងបាននាំចេញសាច់គោ ទៅណ្ដាប្រទេសចំនួន២ គឺប្រទេសវៀតណាម និងប្រទេសថៃ។
លោកបញ្ជាក់ទៀតថា “…សម្រាប់ប្រទេសដែលគ្រោងនឹងនាំចេញបន្ដទៀត រួមមានប្រទេសធំជាងគេគឺ ចិន ជប៉ុននិងប្រទេសនានាជាច្រើនទៀត…ឥឡូវនេះយើងកំពុងតែរៀបចំសុំណុំបែបបទ ឯកសារនានាដើម្បីស្នើសុំក្នុងការនាំចេញ…”។
លោកថា សម្រាប់ទីផ្សារកម្ពុជាថ្វីត្បិតតូច ប៉ុន្ដែអតិថិជន នៅតែគាំទ្រសាច់គោអូស្ដ្រាលីដដែល ហើយបញ្ហាប្រឈមនោះគឺមានតិចតួចបំផុត។ រីឯតម្លៃ គឺមិនមានការតម្លើងថ្លៃនោះទេ គឺសាច់គោល្អតម្លៃត្រឹមតែ៦ដុល្លារនិងសាច់ធម្មតាតម្លៃដូចទៅនឹងសាច់គោធម្មតាដែរ ៕ ក្រពុំ
