មន្រី្តកីឡាអូឡាំពិកកម្ពុជាបានឲ្យថា ប្រព័ន្ធហេដ្ឋារចនាសម្ព័ន្ធកីឡា ដែលបានសាងសង់រួចរាល់ ក្នុងដំណាក់កាលទី១នេះ រួមមាន: មជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល ទីលានបាល់បោះ ទីលានបាល់ទះ និង អគារស្នាក់នៅរបស់អត្តពលិក។ ក្រៅពីការសម្ពោធ ហេដ្ឋារចនាសម្ព័ន្ធកីឡា សម្តេចតេជោ ហ៊ុន សែន នឹងអញ្ជើញជាកិត្តិយស បើកការដ្ឋានសាងសង់ ពហុកីឡដ្ឋានបាល់ទាត់ ដែលជាការសាងសង់ ក្នុងដំណាក់កាលទី២ ផងដែរ។
មន្រី្តរូបនេះបន្តថា ពហុកីឡដ្ឋានជាតិ មរកតតេជោ ត្រូវបានជ្រើសរើស សាងសង់លើទីតាំងផ្ទៃដី ទំហំ៨៥,៣៥ហិកតា ដែលស្ថិតនៅចន្លោះទន្លេសាប និងទន្លេមេគង្គ និងមិនឆ្ងាយពី ទីក្រុងភ្នំពេញ។ ពហុកីឡដ្ឋានេះ នឹងតំណាងឲ្យនិមិត្តរូប វប្បធម៌ ពីអតីតកាល និងជានិមិត្តរូប នៃស្នាដៃកូនខ្មែរ នាសម័យទំនើប សម្រាប់ទសវត្សរ៍ ដែលនឹងឈានចូលមកដល់ នាពេលខាងមុខ៕ ប្រសើរ
