សួន​ សេរីរដ្ឋា​ ប្រធានគណបក្ស បក្សអំណាចខ្មែរ ត្រូវនគរបាលក្រសួងមហាផ្ទៃ ចាប់ខ្លួន

0
309

ភ្នំពេញៈ លោក​ សួន​ សេរីរដ្ឋា​ ប្រធានគណបក្ស បក្សអំណាចខ្មែរ ត្រូវនគរបាលក្រសួងមហាផ្ទៃ ចាប់ខ្លួនកាកពីរសៀល ថ្ងៃទី ១៣ សីហាម្សិលមិញនេះ នៅខណ្ឌព្រែកព្នៅ គ្រាដែលរុបលោកវិលត្រឡប់មកពីខេត្ត ចូលរាជធានីវិញ។ លោក សួន សេរីរដ្ឋា ត្រូវចាប់ខ្លួនបន្ទាប់ពី រូបលោកបានបង្ហោះកាលពីថ្ងៃសៅរ៍ម្សិលមិញថា​ “សាមកុក របស់លោក ហ៊ុន សែន កំពុងបែកកុក! សេនាប្រមុខ ដាក់បញ្ជាឲ្យកងទ័ពត្រៀមប្រយុទ្ធ ដាក់ឱសានវាទឲ្យសត្រូវ… តែឱនក្បាលចូលបន្ទាយសត្រូវដើម្បីសុំចរចា!

ហ្វេសប៊ុកដដែល​ បានសរសេរខ្លឹមសារផ្សាយទៀតថា “ពេលសង្គ្រាមកើតឡើងជាមួយនឹងប្រទេសលាវនោះ លទ្ធផលវាហ្នឹងមិនខុសពីសង្គ្រាមដែលកើតឡើងជាមួយនឹងប្រទេសសៀមទេ ! គឺ កូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង!។ តែទោះបីយ៉ាងណា និងទោះបីជាយើងដឹងថា វាជាសង្គ្រាមដើម្បីដំឡើងមុខដំឡើងឋានៈ បំពាក់ខ្លួនឥស្សរៈចោរ បន្លំឲ្យក្លាយទៅជាឥស្សរៈជនបំភាន់យើងក៏ដោយ… ក៏សូមពលរដ្ឋខ្មែរ យុវជនខ្មែរ ត្រូវរួមសាមគ្គីគ្នាលើកទឹកទឹកចិត្ត និងជួយគ្រប់យ៉ាងដែលអាចជួយបានដល់កងទ័ពជាតិរបស់យើង ដែលតែងយកទ្រូងទៅពាំងគ្រាប់រំសេវ ដើម្បីបុព្វហេតុការពារទឹកដីពិតប្រាកដ”

ការបង្ហោះខ្លឹមសារខាងលើនេះ កងកម្លាំងប្រដាប់អាវុធជាច្រើននាក់​ បានប្រតិកម្មនឹងសម្ដីរបស់លោក​ សួន​ សេរីរដ្ឋា​ មេបក្សអំណាចខ្មែរ ដោយពួកគេបានចាត់ទុកថា​ លោក​ សួន​ សេរីរដ្ឋា​ កំពុងជាន់ឈ្លីកងទ័ពខ្មែរទាំងអស់។ ការប្រតិកម្មដោយជំហរបែបនេះ​ បន្ទាប់ពី​លោក​ សួន​ សេរីរដ្ឋា​ បានរិះគន់ធ្ងន់ៗ ទៅលើនាយករដ្ឋមន្រ្តីកម្ពុជា​ តាមបណ្តាញសង្គមហ្វេស​ប៊ុក​ រហូតដល់មានការចាប់ឃាត់ខ្លួនរូបលោក។

អ្នកនាំពាក្យ​ក្រសួងការពារជាតិ ឧត្តមសេនីយឯក ឈុំ​ សុជាតិ ថ្លែងប្រាប់អង្គភាពសារព័ត៌មាន​ CAM POST នៅល្ងាចថ្ងៃអាទិត្យ​ ទី១៣ ខែសីហានេះថា​ កងទ័ពទាំងមូល បានប្រតិកម្មចំពោះលោក​ សួន​ សេរីរដ្ឋា​។

បើតាមលោកផ្កាយ​៣ ឈុំ​ សុជាតិ ៖ “វាមិនមែនឈាមខ្មែរ​ទេ​ អាហ្នឹងឈាមឈ្លើងហ្មង​ …..មើលងាយកងទ័ព​ គេពលីជីវិត ដើម្បីការពារជាតិ​ ការពារសមរភូមិ​….. វាមើលងាយ​…. ​មើលងាយ​ ប៉ុណ្ណឹង”

លោក​ ឈុំ​ សុជាតិ ប្រាប់ទៀតថា​ “ខ្ញុំ​គាំទ្រកងទ័ពទាំងអស់​ ដែលនៅសមរភូមិមុខថ្កោលទោស​យ៉ាងធ្ងន់ធ្ងរចំពោះបុគ្គល​ សួន​ សេរីរដ្ឋា​ ដែលប្រមាថកាបទានចំពោះកងទ័ព និងមេទ័ពទាំងអស់​ ដែលនៅព្រំដែន។ លោកចាត់ទុកថា​ អំពើដែលលោក​ សួន​ សេរីរដ្ឋា​ ធ្វើ​មិនអាចអត់ឱនឲ្យបានឡើយ​ ដោយសារតែគាត់មើលងាយកង​ទ័ព ដល់ថ្នាក់ដឹកនាំកងទ័ពរបស់ក្រសួងការពារជាតិ​ និងមើលងាយរដ្ឋាភិបាល​ ៕ ប្រសើរ

 

 

LEAVE A REPLY

Please enter your comment!
Please enter your name here