ភ្នំពេញៈ យ៉ាងហោចណាស់មានក្មេងស្រីអាយុ១២ឆ្នាំម្នាក់ បានបាត់បង់ជីវិត និងម្នាក់ទៀតរងរបួសធ្ងន់ ត្រូវបានគេដឹកទៅសង្គ្រោះនៅមន្ទីរពេទ្យ ក្រោយពីពួកគេដឹកនាំគ្នាឡើងជិះកន្ត្រកវិលក្នុងកន្លែងកម្សាន្តមួយកន្លែង ស្ថិតក្នុងភូមិក្រាំងអង្ក្រង សង្កាត់ត្រាំងឃ្នង់ ខណ្ឌសែនសុខ ហើយត្រូវខ្សែភ្លើងឆក់ ។
តាមប្រភពព័ត៌មាន បានឲ្យដឹងថា កាលពីវេលាម៉ោង៩យប់ថ្ងៃទី១២ ខែវិច្ឆិកា ឆ្នាំ២០១៧ មានក្មេងស្រី២នាក់ ម្នាក់មានអាយុ១២ឆ្នាំ និងម្នាក់ទៀត អាយុ១៤ឆ្នាំ បានដឹកដៃគ្នាដើរទៅជិះកន្រ្តកវិលយ៉ាងសប្បាយ លុះមកដល់វេលាម៉ោង៩និង១៥នាទីយប់ ស្រាប់តែកន្រ្កកវិលខុសបច្ចេកទេស ធ្វើឲ្យខ្សែភ្លើងឆក់ក្មេងស្រីអាយុ១២ឆ្នាំ ស្លាប់ភ្លាមៗមួយកន្លែង រីឯម្នាក់ទៀតរងរបួសធ្ងន់ ត្រូវបានដឹកយកទៅសង្រ្គោះនៅមន្ទីរពេទ្យ។
ក្រោយពីមានហេតុការណ៍ឆក់ក្មេងស្រីខាងលើនេះ សមត្ថកិច្ចក៏បានចុះមកដល់ ធ្វើការពិនិត្យ និងហៅម្ចាស់កន្រ្តកមកសាកសួរ ដើម្បីបន្តនីតិវិធីតាមច្បាប់។ ចំណែកសាកសពក្មេងស្រី សមត្ថកិច្ចបានប្រគល់ជូនឱពុកម្ដាយ ដើម្បីយកធ្វើបុណ្សតាមប្រពៃណីនៅគេហដ្ឋាន៕ អូន ធួក
