ស្ទឹងត្រែង ៖កម្លាំងនគរបាលនៃការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តស្ទឹងត្រែង នៅថ្ងៃទី២១ ខែវិច្ឆិកា ឆ្នាំ២០១៦ បានបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន នៅចំណុចក្នុងព្រៃស្ថិតក្នុងភូមិកាំងមេម៉ាយ សង្កាត់ព្រះបាទ ក្រុងស្ទឹងត្រែង ឃាត់ខ្លួនជនសង្ស័យ១នាក់ ចាប់យកវត្ថុតាងថ្នាំញៀន ប្រភេទមេតំហ្វេតាមីនក្រាមពណ៌សថ្លា(ICE) ចំនួន ០១កញ្ចប់តូច សរុបទម្ងន់ ០,២ក្រាម ឃាត់ខ្លួនជនសង្ស័យឈ្មោះ ម៉ៅ ភក្តី ភេទប្រុស អាយុ៣១ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅបច្ចុប្បន្នភូមិព្រែក សង្កាត់ក្រុង/ខេត្តស្ទឹងត្រែង។
នៅចំពោះមុខសមត្ថកិច្ច ជនសង្ស័យខាងលើ បានឆ្លើយសារភាពនៅថ្ងៃខែឆ្នាំដដែល អំពីសកម្មភាពប្រព្រឹត្តបទល្មើសរបស់ក្រុមខ្លួន ។ ទើបនៅវេលាម៉ោង១៦និង៣០នាទី កម្លាំងជំនាញ បានបន្តទៅឆែកឆេរផ្ទះជួលមួយកន្លែងស្ថិតក្នុងភូមិព្រែក សង្កាត់-ក្រុងស្ទឹងត្រែង ចាប់យកវត្ថុតាងថ្នាំញៀនប្រភេទមេតំហ្វេតាមីនក្រាមពណ៌សថ្លា(ICE) ចំនួន ០៦កញ្ចប់តូច សរុបទម្ងន់ ១,២ក្រាម និងឃាត់ខ្លួនជនសង្ស័យចំនួន០២នាក់៖ ១- ឈ្មោះ ហូវ អក ភេទស្រី អាយុ ២៩ឆ្នាំ ជនជាតិ ខ្មែរ មុខរបរ មិនពិតប្រាកដ ទីលំនៅបច្ចុប្បន្នភូមិភូមិព្រែក សង្កាត់/ក្រុង/ខេត្តស្ទឹងត្រែង និង២- ឈ្មោះ សុខ ឃាង ភេទស្រី អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នភូមិព្រែក សង្កាត់/ក្រុង ខេត្តស្ទឹងត្រែង។ ៕ សំបូរ
