មេ​ឈ្មួញ​ហាក់ សុគានិង ឧកញ៉ា​ តុ​ប វី​ដា រួមគ្នារកស៊ី​ដឹកជញ្ជូន​ឈើ​ចេញទៅ​វៀតណាម ?

0
235

ខេត្តមណ្ឌលគិរី ៖ ប្រភពពី​​ខេត្តមណ្ឌលគិរី បាន​ឲ្យ​ដឹងថា មួយរយៈ​កន្លងទៅនេះ​មេ​ឈ្មួញ តុ​ប វី​ដា ដែលជា​ឧ​ត្ត​ម​សេនីយ៍​យោធា និង​ជា​មេបញ្ជាការរង​យោធា​យោធភូមិភាគ១ ព្រមទាំង​ឈ្មួញ​ឈ្មោះ ហាក់ សុគា កំពុង​បង្កើន​សកម្មភាព​ដឹកជញ្ជូន​ឈើ​ចេញទៅ​ស្រុក​យួន​យ៉ាង​អនាធិបតេយ្យដោយគ្មានស្ថាប័នណាហ៊ានបង្រ្កាបឡើយ ។

ប្រភព​បាន​ឲ្យ​ដឹង​ទៀតថា​មេ​ឈ្មួញ តុ​ប វី​ដា ដែល​ល្បីល្បាញ​ខាង​បំផ្លាញ​ព្រៃឈើ​ជា​យូរ​មកហើយ និង​មេ​ឈ្មួញ ហាក់ សុគា ដែល​ជ្រក​ក្រោម​ស្លាក​នគរបាល​ប្រឆាំង​បទល្មើស​សេដ្ឋកិច្ច​ក្រសួងមហាផ្ទៃ​កំពុង​រត់ការ​ដឹកជញ្ជូន​ឈើ​ពី​ប្រទេស ឡាវ ឆ្លងកាត់​ខេត្តស្ទឹងត្រែង ហើយ​ដឹកជញ្ជូន​បន្ត​ចេញទៅ​ស្រុក​យួន​យ៉ាង​រលូន គ្មាន​មន្ត្រីរដ្ឋបាល​ព្រៃឈើ ឬ​សមត្ថកិច្ច​ពាក់ព័ន្ធ​ណា​ហ៊ាន​ចាត់វិធានការ ទប់ស្កាត់​ឡើយ។

ប្រភពពី​សមត្ថកិច្ច​ក្នុង​ខេត្តស្ទឹងត្រែង ក៏បាន​ឲ្យ​ដឹង​ដែរ​ថា​ឈ្មោះ ហាក់ សុគា ដែលជា​នគរបាល​ប្រឆាំង​បទល្មើស​សេដ្ឋកិច្ច ក្រសួងមហាផ្ទៃ ធ្លាប់ជា​មេ​ការប្រមូលទិញ​ឈើ​ឲ្យ​ក្រុមហ៊ុន​របស់​ឧកញ៉ា ទ្រី ភាព នាពេល​កន្លងមក​ផងដែរ។ ឥឡូវនេះ​ឈ្មួញ​ឈ្មោះ ហាក់ សុគា ដែលមាន​តួនាទី​ជា​នគរបាល​ប្រឆាំង​បទល្មើស​សេដ្ឋកិច្ច​ក្រសួងមហាផ្ទៃ កំពុង​ប្រើ​តួនាទី​និង​អំណាច​ធ្វើជា​ឈ្មួញកណ្ដាល​ក្នុងការ​ប្រមូល​ប្រជាពលរដ្ឋ ឲ្យ​ចូល​ព្រៃ​កាប់​ឈើ​យកមក​លក់​ឲ្យ​ខ្លួន ហើយ​ឈើ​ទាំងនោះ​ត្រូវ​លក់​បន្តទៅ​ឲ្យ​មេ​ឈ្មួញ តុ​ប វី​ដា ដើម្បី​ដឹកជញ្ជូន​ចេញទៅ​ស្រុក​យួន​តាម​ច្រកព្រំដែន​ក្នុងស្រុក​ស្នួល ខេត្តក្រចេះ និង​ច្រកព្រំដែន​ក្នុងស្រុក​មេមត់ ខេត្ត​ត្បូងឃ្មុំ។ ការដែល​មេ​ឈ្មួញ​ឈ្មោះ ហាក់ សុគា អាចធ្វើ​អ្វី​ស្រេច​តែ​អំពើ​ចិត្ត​គឺមាន​ការឃុបឃិត​គ្នា​ជាមួយ​មេ​រដ្ឋបាល​ព្រៃឈើ​ក្នុង​ខេត្តមណ្ឌលគិរី មេ​រដ្ឋបាល​ព្រៃឈើ​ខេត្តស្ទឹងត្រែង និង​មេ​រដ្ឋបាល​ព្រៃឈើ​ខេត្តក្រចេះ​ផងដែរ។

ប្រភពដដែលឲ្យដឹងទៀតថា មេ​ឈ្មួញ ហាក់ សុគា និង​មេ​ឈ្មួញ តុ​ប វី​ដា កំពុង​រត់ការ​ដឹកឈើ​ពី​ប្រទេស​ឡាវ ឆ្លងកាត់​ខេត្តស្ទឹងត្រែង យកទៅលក់​នៅ​លក់​នៅ​ស្រុក​យួន​រាប់ពាន់​ម៉ែត្រគូប​រួចទៅហើយ។ រាល់​សកម្មភាព​របស់​ឈ្មួញ​ទាំង២នាក់​នេះ គ្មាន​មន្ត្រី​អាជ្ញាធរ មន្ត្រី​ជំនាញ ឬ​សមត្ថកិច្ច​ពាក់ព័ន្ធ​ណា​ហ៊ាន​ប៉ះពាល់​ទប់ស្កាត់​នោះទេ ព្រោះ​ទាំង​មេ​ឈ្មួញ តុ​ប វី​ដា និង​មេ​ឈ្មួញ ហាក់ សុគា សុទ្ធ​តែមាន​ខ្នងបង្អែក​រឹងមាំ​ចាំ​ជួយ​ការពារ​គ្រប់ពេលវេលា សូម្បីតែ​គណៈកម្មការ​បង្ក្រាប​និង​ទប់ស្កាត់​បទល្មើស​ព្រៃឈើ ក៏​រក្សា​ភាព​ស្ងៀមស្ងាត់​មិន​ហ៊ាន​ក្អកទេ។

ទាក់ទិនរកស៊ីដឹកឈើទៅវៀតណាមនេះ MCN.news មិនអាចសុំការបំភ្លឺពីមេឈ្មួញបានទេ ព្រោះគ្មានទូរសព័្ទទាក់ទង ៕ សំបូរ

LEAVE A REPLY

Please enter your comment!
Please enter your name here