ភ្នំពេញ៖ យុវជន២នាក់រងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ខណៈដែលជិះម៉ូតូឌុបគ្នាក្នុងល្បឿនពេលដល់ចំណុចផ្លូវបំបែកជាបួនមិនបន្ថយល្បឿនក៏ជ្រុលបុករថយន្តសុិនទ្រីពីចំហៀងពេញទំហឹង។ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអាធ្រាតឈានចូលថ្ងៃទី២៨ ខែវិច្ឆិកា ឆ្នាំ២០១៧ នៅចំណុចផ្លូវលេខ១៩៩កែងផ្លូវលេខ៣៨៨ ស្ថិតក្នុងសង្កាត់ទួលស្វាយព្រៃទី១ ខណ្ឌចំកាមន ហើយរថយន្តបានព្យាយាមបើករត់រហូតដល់ផ្សារអូឡាំពិចទើបសមត្ថកិច្ចដេញឃាត់បានភ្លាមៗ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តសុិនទ្រី គ្មានស្លាកលេខធ្វើដំណើរតាមបណ្តោយផ្លូវលេខ១៩៩ ក្នុងទិសដៅពីលិចទៅកើត ខណៈមកដល់ចំណុចកើតហេតុស្រាប់តែមានយុវជន២នាក់ជិះម៉ូតូម៉ាកហុងដា ពណ៌ខ្មៅ ពាក់ស្លាកលេខភ្នំពេញ1CD 3014 ធ្វើដំណើរតាមបណ្តោយផ្លូវលេខ៣៨៨ក្នុងទិសដៅពីត្បូងទៅជើងក្នុងល្បឿនលឿនដោយជាន់ហ្វ្រាំងមិនទាន់ក៏ជ្រុលបុកចំកង់រថយន្តចំហៀងខាងស្តាំផ្នែកខាងក្រោយបណ្តាលអោយដួលបោកក្បាលរងរបួសធ្ងន់។ភ្លាមៗនោះរថយន្តសុិទ្រីបានបន្តដំណើរព្យាយាមបើកគេចខ្លួនតែត្រូវបានកម្លាំងល្បាតឃើញក៏ដេញឃាត់បានមកវិញផងដែរ
ក្រោយកើតហេតុជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែករថយន្តនិងម៉ូតូត្រូវបានកម្លាំងនគរបាលមូលដ្ឋានចុះធ្វើកាវាស់វែងយកទៅរក្សាទុករងចាំដោះស្រាយពេលក្រោយ៕សារ៉េត