ភ្នំពេញ ៖ បុរសវ័យក្មេងម្នាក់ស្លាប់ភ្លាមៗ ខណៈដែលជិះម៉ូតូត្រូវរថយន្តដឹកដីបុកយ៉ាងពេញទំហឹង។ហេតុការណ៍នេះបានកើតឡើងកាលពីវេលាម៉ោង ៦និង១៥នាទី ព្រឹក ថ្ងៃទី ១ ខែធ្នូ ឆ្នាំ២០១៧ នៅលើផ្លូវបេតុង ក្បែរផ្លូវរថភ្លើង សង្កាត់កាកាប១ ខណ្ឌពោធិ៍ជ័យ រាជធានីភ្នំពេញ ។
ជនរងគ្រោះ មិនទាន់ស្គាល់អត្តសញ្ញាណ ជិះម៉ូតូម៉ាកគុបជ្រុង ពណ៌ទឹកប្រាក់ ពាក់ស្លាកលេខ កំពង់ចាម 1B-8102 ។ មានប្រពន្ធនិងកូន តូច២នាក់ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ ជនរងគ្រោះជិះម៉ូតូ ជាមួយកូនប្រុសអាយុប្រហែល១០ឆ្នាំ ធ្វើដំណើរតាមផ្លូវ បេតុង ក្នុងទិសដៅពីជើងទៅត្បូង រីឯរថយន្តដឹកដីបង្ក បើកបរពីត្បូងទៅជើង (បញ្ច្រាសទិស) លុះមកដល់ចំណុច កើតហេតុ រថយន្តដឹកដីបានវ៉ាជែងរថយន្ត១គ្រឿងទៀត រួចជ្រុលបុកជនរងគ្រោះ បណ្តាលបោកផ្ទប់ក្បាលទៅនឹងថ្នល់ស្លាប់ រីឯកូនតូចរងរបួសតិចតួច ។ ភ្លាមៗរថយន្តដឹកដីដែលគ្មានស្លាកលេខ បានបន្ថែមល្បឿន រត់គេចបាត់ ។ បន្ទាប់មកភរិយាជនរងគ្រោះបីកូនតូចយំឱប និងស្រែកហៅប្តីឱ្យដឹងខ្លួនឡើងតែប៉ុណ្ណោះ។
ក្រោយពីកើតហេតុគេឃើញកម្លាំងនគរបាលមូលដ្ឋានចុះទៅកន្លែងហេតុដើម្បីធ្វើចរាចរណ៍ព្រមទាំងទំនាក់ទំនងទៅនគរបាលជំនាញនៃស្នងការក្រុងមកធ្វើការវាស់វែងម៉ូតូជនរងគ្រោះទៅរក្សាទុករងចាំប្រពន្ធយកឯកសារមកទទួលទៅវិញ។ចំណែកឯសាកសពជនរងគ្រោះត្រូវបានកម្លាំងនគរបាលធ្វើឯកសារប្រគល់ទៅអោយប្រពន្ធព្រមទាំងសាច់ញាត្តិយកទៅធ្វើបុណ្យតាមប្រពៃណីនៅឯស្រុកកំណើត៕៩៨សែនជ័យ