ភ្នំពេញ៖និសិត្សម្នាក់ខំជិះម៉ូតូពីស្រុកកំណើតឡើងមកភ្នំពេញ ដើម្បីទទួលសញ្ញាប័ត្រ តែជាអកុសលបានបាក់កស្លាប់ក្នុងទឹក បន្ទាប់ពីជិះម៉ូតូក្នុងស្ថានភាពផ្លូវងងឹតខ្លាំងបានធ្លាក់ស្ពានបោកនិងជើងស្ពានស្លាប់ភ្លាមៗតែម្តង។ហេតុការណ៍នេះបានកើតឡើងកាលពីវេលា ម៉ោង៩យប់ថ្ងៃទី១១រោច ខែមគិសិរ ឆ្នាំរកា នព្វស័ក ព.ស២៥៦១ ត្រូវនិងថ្ងៃទី ១១ ធ្នូ ២០១៧ ចំណុចស្ពានថ្មមួយកន្លែងស្ថិតក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ។
សពជនរងគ្រោះមានឈ្មោះ សុខ ចាន់រស្មី អាយុ២៧ឆ្នាំ មានទីលំនៅភូមិពៃ ឃុំត្នោត ស្រុកបាទី ខេត្តតាកែវ ជិះម៉ូតូម៉ាក ហុងដាឌ្រីម សង់សេ១២៥ពណ៌ ខ្មៅស៊េរី 015 1CT-9079 ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនរងគ្រោះ(សព) ជិះម៉ូតូម្នាក់ឯងតាមបណ្តោយផ្លូវ២១៧ ចំការដូង ពីត្បូងទៅជើងខណៈជិះជិតដល់កន្លែងកើតហេតុ ដោយទីតាំងខាងលើមិនមានភ្លើងបំភ្លឺផ្លូវ ជាហេតុជនរងគ្រោះមើលផ្លូវមិនច្បាស់ ស្រាប់ដល់ចំណុចខាងលើបានរ៉េចង្កូតធ្លាក់ស្ពាន បណ្តាលអោយជនរងគ្រោះ(សព)បោកនិងជើងស្ពានថ្ម បាក់កស្លាប់ក្នុងទឹក ហើយក៏មានប្រជាពលរដ្ធមើលជួយលើកចេញពីទឹកតែជនរងគ្រោះ(សព)បានស្លាប់បាត់ទៅហើយទើបរាយការដល់សមត្ថកិច្ចមកពិនិត្យកន្លែងកើតហេតុ។
ក្រោយកើតហេតុនគរបាលមូលដ្ឋាននិងជំនាញចរាចរណ៍ខណ្ឌបានមកដល់កន្លែងកើតហេតុឆែកឆេររកអត្តសញ្ញាណ ដើម្បីទាក់ទងទៅក្រុមគ្រួសារមកទទួលសពយកទៅធ្វើបុណ្យនៅឯស្រុកកំណើត ចំណែកម៉ូតូយកទៅរក្សាទុកនៅអធិការនគរបាលខណ្ឌដង្កោ ៕បញ្ញា