ភ្នំពេញ៖ស្ត្រីមានផ្ទៃពោះម្នាក់ជិះម៉ូតូទៅកាន់ចំណតរថយន្តក្រុងរិទ្ធមុន្នីដើម្បីស្វែងរកប្តី ខណៈដែលប្ដីរបស់នាងបំរុងជិះរថយន្តទៅធ្វើការតាមខេត្ត ប៉ុន្តែស្ត្រីរូបនោះមិនឃើញ(ប្ដី)ក៏សម្រេចចិត្តរត់ចូលរថយន្តសម្លាប់ខ្លួនតែសំណាងល្អអ្នកនៅក្បែរឃើញទាន់ចាប់ឃាត់។ហេតុការណ៍នេះបានកើតឡើងកាលពីថ្ងៃ អង្គារ៍៩រោច ខែ មិគសិរ ឆ្នាំរកា ព.ស ២៥៦១ត្រូវនិងថ្ងៃទី ១២ ខែ ធ្នូ គ.ស ២០១៧ វេលាម៉ោង២២៖៤០នាទីយប់ ស្ថិតនៅចំណតរថយន្តក្រុងរិទ្ធមុន្នីតាមបណ្តោយផ្លូវម៉ៅសេទុងក្នុងសង្កាត់បឹងសាឡាងខណ្ឌទួលគោករាជធានីភ្នំពេញ។
តាមប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេឃើញស្រ្តីមានផ្ទៃម្នាក់វ័យប្រហែល៣៧ឆ្នាំជិះម៉ូតូម៉ាកHonda dream c125 ពណ៌ខ្មៅស៊េរី2015ពាក់ស្លាកលេខកំពង់ចាម1N-0554ធ្វើដំណើរកមចំណតរថយន្តក្រុងរិទ្ធមុន្នីដើម្បីរកប្តីដែលចេញទៅធ្វើការតាមខេត្តតែរកមិនឃើញក៏អង្គុយមើលឆ្វេងមើលស្ដាំ។មួយសន្ទុះក្រោយមកស្រាប់ដើរចេញមកថ្នល់បំរុងរត់ចូលរថយន្តបង្កអោយមានការភ្ញាក់ផ្អើលដល់ប្រជាពលរដ្ឋចោមរោមមើល ខ្លះចាប់ឃាត់ ខ្លះទៀតឃាត់រថយន្តដើម្បីកុំអោយស្ត្រីរូបនោះសម្លាប់ខ្លួន។ភ្លាមៗនោះប្រជាពលរដ្ឋដែលឃើញហេតុការណ៍រាយការណ៍ប្រាប់សមត្ថកិច្ចក្នុងមូលដ្ឋានចុះមកជួយអន្តរាគមន៍។ បន្ទាប់មកកម្លាំងសមត្ថកិច្ចក៏ឃាត់ខ្លួនសួរនាំនិងទំនាក់ទំនងរកសាច់ញ្ញាតិតែស្រ្តីនោះមិនព្រមឆ្លើយ!គិតតែពីចង់សម្លាប់តែប៉ុណ្ណោះ។
ក្រោយពីកើតហេតុគេឃើញប្អូនស្រីរបស់នារីប៉ងសម្លាប់ខ្លួនមកដល់កន្លែងកើតហេតុជួយសម្របសម្រួលព្រមទាំងមានការជួយណែនាំពីសមត្ថកិច្ចអស់រយៈពេលប្រហែលជិតមួយម៉ោងទើបស្រ្តីនោះស្តាប់ហើយនៅស្ងៀមស្ងាត់ជាមួយប្អូនស្រី។
បច្ចុប្បន្ននេះស្ត្រីខាងលើបានជិះម៉ូតូវិលត្រឡប់ទៅគេហដ្ឋានជាមួយប្អូនស្រីវិញ៕ខុងមុីង