រថយន្ត​បើក​បុក​រថយន្ត​ជ្រុល​ចង្កូត​ទៅ​សួន​ច្បារ​ពុះ​ចែក​ទ្រូង​ផ្លូវ​តែ​សំណាង​ល្អ​មិន​បង្ក​គ្រោះ​ថ្នាក់​ដល់​មនុស្ស​

សន្តិសុខសង្គម

 

 

រាជធានីភ្នំពេញ : រថយន្តកូរ៉េដឹកសង្ក័សីមួយគ្រឿង​បានបើកបុកពីក្រោយរថយន្តប៉ែនដឹកដីធុនធំមួយគ្រឿង​ទៀត​ជ្រុលចង្កូតបុកឡើងលើសួនច្បារពុះចែកទ្រូងផ្លូវ តែសំណាងល្អមិនបណ្តាលអោយមានគ្រោះថ្នាក់ដល់មនុស្ស ។ ហេតុការណ៍គ្រោះថ្នាក់នេះបង្កអោយមានការភ្ញាក់ផ្អើលឡើងកាលពីវេលាម៉ោង ៩ព្រឹក​ថ្ងៃ​១១រោច​ខែ​មិគសិរ​ឆ្នាំ​រកា​ព​ស​២៥៦១ត្រូវ​នឹង​ថ្ងៃទី១៤ ខែធ្នូ ឆ្នាំ២០១៧ នៅចំណុចទល់មុខសាលាបឋមសិក្សាភូមិឬស្សី តាមបណ្តោយផ្លូវ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ ។

រថយន្តបង្កជាប្រភេទរថយន្តកូរ៉េធុនធំ ពណ៌ទឹកសមុទ្រ ពាក់ស្លាកលេខភ្នំពេញ 3A-0095 បើកបរដោយឈ្មោះ ភួង គឹមសុឹង​ ភេទប្រុស អាយុ២១ឆ្នាំ មានទីលំនៅស្រុកឧដុង ខេត្តកំពង់ស្ពឺ ។

តាមការរៀបរាប់របស់ តៃកុងរថយន្តខាងលើ អោយដឹងថា ខ្លួនបានបើករថយន្តដឹកសង្ក័សីចេញពីក្រុងតាខ្មៅ ខេត្តកណ្តាល ឆ្ពោះទៅកាន់ស្រុកឧដុង ខេត្តកំពង់ស្ពឺ ដោយមានព្រូលរថយន្តម្នាក់រួមដំណើរជាមួយ ។ លុះបើកបរធ្វើដំណើរមកដល់ចំណុចកើតហេតុ រថយន្តបានបែកទុយោហ្វ្រាំង ជាហេតុធ្វើអោយរថយន្តចាប់ហ្វ្រាំងមិន ក៏ជ្រុលបុកពីក្រោយរថយន្តប៉ែនដឹកដីធុនធំមួយគ្រឿង បណ្តាលអោយរងការខូចខាតផ្នែកខាងមុខយ៉ាងដំណំ ហើយរថយន្តក៏រេចង្កូតបុកឡើងសួនច្បារពុះចែកទ្រូងផ្លូវតែម្តង ។

ក្នុងករណីគ្រោះថ្នាក់ចរាចរណ៍នេះ ពុំមានបណ្តាលអោយមនុស្សណាម្នាក់ រងរបួសឡើយ ហើយក៏ពុំមានបណ្តាលអោយខូចខាតអ្វីដល់ទ្រព្យសម្បត្តិរដ្ឋឡើយ គ្រាន់តែរថយន្តបើកឡើងសួនប៉ុណ្ណោះ ។ ក្រោយកើតហេតុ រថយន្តប៉ែនដឹកដីដែលត្រូវរថយន្តបង្កបុកពីក្រោយ បានជិះចេញពីកន្លែងកើតហេតុ ព្រោះខូចខាតតិចតួច ខ្លួនខ្ជិលមានបញ្ហាច្រើន ។ ដោយឡែកភាគីរថយន្តបង្ក បានទំនាក់ទំនងទៅកាន់ជាងរថយន្តអោយមកជួសជុល ហើយបើកចេញពីកន្លែងកើតហេតុផងដែរ ៕​បញ្ញា​

 

 

Leave a Reply

Your email address will not be published. Required fields are marked *