ភ្នំពេញ៖ បុរសម្នាក់ស្លាប់យ៉ាងអាណោចអាធម៌ ខណះដែលជិះម៉ូតូហុងដាឌ្រីមត្រូវ ម៉ូតូកង់បី(ឡាំប៉ាតា)វ៉ាជែង ប៉ះបណ្តាលអោយដួលរួចកិនស្លាប់ភ្លាមៗ តែម៉ូតូកង់បី(ឡាំប៉ាតា)បន្តដំណើររត់ជាង១គីឡូម៉ែត្រទើបឃាត់បាន។ហេតុការណ៍នេះបានបង្កអោយមានការភ្ញាក់ផ្អើលកាលវេលាម៉ោង ១៨៖៣០នាទីល្ងាចថ្ងៃអាទិត្យទី១ កើត ខែ បុស្សឆ្នាំរកា ព ស ២៥៦១ត្រូវនឹងថ្ងៃ ទី ១៧ ខែធ្នូឆ្នាំ ២០១៧ ស្ថិតនៅតាមបណ្តោយផ្លូវ២០០៤ហៅ(ផ្លូវម៉ៃដា) មុខហាងសែនរីរាយ ស្ថិតក្នុងភូមិត្រពាំងល្វាសង្កាត់កាកាបទី១ ខណ្ឌពោធិ៍សែនជ័យ ។
សពមានឈ្មោះ សុខ តេង អាយុ៣៦ឆ្នាំ មានមុខរបរដឹកឥវ៉ាន់ស្នាក់នៅភូមិ ចំការឪឡឹក សង្កាត់កាកាប២ ខណ្ឌពោធិ៍សែនជ័យ មានស្រុកកំណើត ស្រុកឧដ្តុង ខេត្តកំពង់ស្ពឺនិងមានប្រពន្ធឈ្មោះ ប៉ែន សារុន ភេទស្រីអាយុ៣២ឆ្នាំ រោងចក្រស្នាក់នៅ ជាមួយគ្នា មានភូមិកំណើតនៅភូមិ ទួលក្រូច ឃុំរមាសហែក ស្រុករមាសហែក ខេត្តស្វាយរៀង។ដោយជិះម៉ូតូម៉ាកហុងដាឌ្រីមសេ១២៥ ស៊េរី ២០១៤ ពាក់ស្លាកលេខភ្នំពេញ 1CD-0903។ចំណែកម្ចាស់ម៉ូតូកង់បីឈ្មោះ ស សុវណ្ណភេទប្រុសអាយុ៣៨ ឆ្នាំ មានមុខរបរសន្តិសុខនិង រត់ម៉ូតូកង់បី(ឡាំប៉ាតា)ស្នាក់នៅសង្កាត់ពងទឹក ខណ្ឌដង្កោ មានស្រុកកំណើតនៅ សង្កាត់បឹងទំពុន ខណ្ឌមានជ័យ។រីឯម៉ូតូកង់បីពណ៌លឿងពាក់ស្លាលេខ1GS-0991 ។
តាមប្រភពព័ត៌មានពីកន្លែងកើតហេតុ បានឲ្យដឹងថាមុនពេលកើតហេតុ គេឃើញម៉ូតូរងគ្រោះធ្វើដំណើរតាមបណ្តោយផ្លូវ២០០៤ក្នុងទិសដៅពីត្បូងទៅជើង។លុះមកដល់ចំណុចកើតហេតុ ក៏មានម៉ូតូកង់បីរបស់ជនបង្កមកពីក្រោយស្របទិសគ្នា វ៉ាជែងក្នុងល្បឿនលឿនទៅប៉ះកៀរជាមួយម៉ូតូរងគ្រោះបណ្តាលឲ្យដួលរួចកិនបាក់កស្លាប់ភ្លាមៗយ៉ាងអាណោចអាធម៌។បន្ទាប់មកម៉ូតូកង់បីបន្តដំណើរចេញពីកន្លែងរត់មកដល់មុខផ្សារជិនជូរី ក៏ត្រូវប្រជាពលរដ្ធនិងសមត្ថកិច្ចឃាត់បានទាំងម្ចាស់បើកបរកង់បីតែម្តង។
ក្រោយកើតហេតុគេឃើញកម្លាំងនគរបាលមូលដ្ឋានចុះទៅសម្រួលនៅកន្លែងកើតហេតុ និងឆែករកអត្តសញ្ញាណទាក់ទងទៅសាច់ញាត្តិមកទទួល យកទៅធ្វើបុណ្យតាមប្រពៃណីនៅឯស្រុកកំណើត។ចំណែកម៉ូតូជនរងគ្រោះនឹងម៉ូតូកង់បី(ឡាំប៉ាតា)ទាំង២គ្រឿងព្រមទាំងម្ចាស់ម៉ូតូកង់បីត្រូវបាននាំទៅកាន់ ការិយាល័យចរាចរណ៍ជើងគោកនៃស្នងការនគរបាលរាជធានីភ្នំពេញដើម្បីធ្វើការដោះស្រាយបន្ត។
ប្រភពពីក្រុមគ្រួសារនៃសពបានបន្តទៀតថា បន្ទាប់ពីជំនាញចរាចរណ៍រាជធានីភ្នំពេញ យកអ្នកបើកបរទៅកាន់ការិយាល័យចរាចរណ៍ជើងគោកនៃស្នងការនគរបាលរាជធានីភ្នំពេញភ្លាមៗភាគីខាងជនបង្កបានមកកំរាមកំហែងទៅលើបងប្អូនគ្រួសារនៃសពអោយដោះស្រាយភ្លាមៗ ដោយអោយចំនួន៥០០ដុល្លារ៍ បើមិនយកថ្លៃសំណងប៉ុណ្ណឹងប្រាកដជាអត់ហើយភាគីបង្កនិយាយថា គេមានខ្នងប៉ូលីស មានឋានៈផ្កាយ មិនស្រួល មិនបានមួយរៀលផង៕សារ៉េត