ភ្នំពេញ ៖ បុរសម្នាក់ដើរទៅលេងម្តាយរស់នៅផ្ទះប្អូនស្រី ពេលទៅដល់មានអាការវិលមុខបានដួលទៅលើម្តាយសន្លប់ស្តូក បានបញ្ជូនទៅដល់មន្ទីរពេទ្យ គ្រូពេទ្យប្រាប់ថាស្លាប់ហើយ។ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង០៦និង១៥នាទីយប់ថ្ងៃព្រហស្បតិ៍ ៤កើតខែបុស្សឆ្នាំរកា ព ស ២៥៦១ត្រូវនឹងថ្ងៃទី២០ ខែធ្នូ ឆ្នាំ២០១៧ ស្ថិតនៅភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ ។
ជនរងគ្រោះមានឈ្មោះ ឈឿន សារុំ ភេទប្រុស អាយុ៣៤ឆ្នាំ មុខរបរនៅផ្ទះ អតីតធ្វើការនៅក្រុមហ៊ុន YAMAHA ស្នាក់នៅផ្ទះជួលភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ មានស្រុកកំណើតនៅស្រុកកណ្ឌៀង ខេត្តពោធិ៍សាត់ មានបងប្អូន៣នាក់ស្រីម្នាក់ និងប្រុស២នាក់ ជនរងគ្រោះជាកូនច្បង រស់នៅម្នាក់ឯងនៅលីវ ។
តាមសម្ដីប្អូនបង្កើតរបស់ជនរងគ្រោះសុំមិនបញ្ចេញឈ្មោះបានឲ្យដឹងថា មុនពេលកើតហេតុបងប្រុសរបស់ខ្លួនស្នាក់នៅផ្ទះជួលតែម្នាក់ឯង រួចមកលេងផ្ទះគាត់ ដែលរស់នៅជាមួយម្តាយក្បែរគ្នានោះ។ហើយនិយាយប្រាប់ម្ដាយថា ដូចជាវិលមុខណាស់ ក៏បានដួលទៅលើឥដ្ឋការ៉ូលើម្តាយបង្កើតរបស់ខ្លួន។បន្ទាប់មកភ្លាមៗនោះសាច់ញាតិបានហៅរថយន្តសង្គ្រោះបង្អែកពោធិ៍ចិនតុងដឹកយកទៅមន្ទីរពេទ្យព្រះកុសមៈ ពេលទៅដល់មន្ទីរពេទ្យ លោកគ្រូពេទ្យប្រាប់ថា ស្លាប់ទៅហើយ ក៏បានដឹកយកទៅតម្កល់នៅវត្តពោធិ៍ចិនតុង តែក្រុមគ្រួសារមិនអស់ចិត្តហៅសមត្ថកិច្ចជំនាញកោសលវិច្ឆ័យពិនិត្យឃើញជនរងគ្រោះពិតជាស្លាប់ដោយសារខ្យល់.គពិតប្រាកដមែន ៕៩៨