ភ្នំពេញ ៖ទីតាំងហ្គេមបាញ់ត្រីពីរកន្លែងក្បែរគ្នា បើកដំណើរការយ៉ាងរលូន ដោយមួយកន្លែងធ្លាប់ត្រូវបានបង្រ្កាប និងមួយកន្លែងទៀតមិនធ្លាប់សោះ។ ទីតាំងទាំងពីរនេះស្ថិតនៅលើផ្លូវ២៧៣ ពីលិចអតីតផ្លូវរថភ្លើងទល់មុខស្ថានីយបូមទឹកស្អុយទួលគោក ក្នុងសង្កាត់ទួលសង្កែទី២ ខណ្ឌឬស្សីកែវ ពុំឃើញមានអាជ្ញារធរមូលដ្ឋានចុះបង្ក្រាបឡើយ។
ទីតាំងបាញ់ត្រីពីរកន្លែងក្បែរគ្នា បើកដំណើរការយ៉ាងរលូនចាប់ពីម៉ោងជាង៩យប់ជារៀងរាល់ថ្ងៃ ដោយមួយកន្លែងធ្លាប់ត្រូវបានបង្រ្កាប មានទ្វារពណ៍ខៀវពេលថ្ងៃត្រូវបានចាក់សោយ៉ាងស្អាតដូចជាគ្មានល្បែងអីនោះទេ ស្រាប់តែពេលយប់វិញបើកយ៉ាងរលូនចេញចូលបិតទ្វារយ៉ាងស្ងៀមស្ងាត់ មិនរំខានសមត្ថកិច្ចមូលដ្ឋានឡើង។ ដោយឡែកមួយកន្លែងទៀតមិនធ្លាប់បង្រ្កាបសោះ ព្រោះអ្នកលេងចេញបិត ចូលបិត ទីតាំងនោះមានទ្វារដែករូតចាស់ ដែលមានលេខពណ៍ក្រហមជាសម្គាល់ (១២៣៨)ទាល់តែយប់ទើបបើដំណើរការដូចគ្នា ។
តាមប្រភពព័ត៌មានពីប្រជាពលរដ្ឋនៅក្បែរខាងទីតាំងបាញ់ត្រីទាំងនេះបានឲ្យដឹងថា បទល្មើសផ្សេងៗដែលកើតមាននៅ ក្នុងរាជធានីភ្នំពេញមួយចំនួនធំ គឺផ្ដើមចេញប្រភពនៃបនល្បែងស៊ីសងនេះ ខណៈទីតាំងបើកសេវាកម្សាន្ដហ្គេមបាញ់ត្រីតាមបណ្ដាផ្ទះល្វែង លក្ខណៈចំហពង្វក់សិស្សនិស្សិតក្រុមបងតូចបងធំ ភ្លេចបាយភ្លេចទឹក ភ្លេចសាលា និងក្បត់ទំនុកចិត្ដឪពុកម្ដាយ អាណាព្យាបាលដោយញៀននឹងល្បែងទាំងនេះ ។
ប្រភពដដែលបានបន្តថា សមត្ថកិច្ចនិងអាជ្ញាធរមូលដ្ឋានមួយចំនួនបានទទួលផលប្រយោជន៍ពីក្រុមឈ្មួញបើកទីតាំងប្រភេទហ្គេម អាជ្ញាធរ និងសមត្ថកិច្ចខ្លះទៀតរារែកក្នុងការបង្ក្រាប។ចំណែកអ្នកកាងហ្គេមបាញ់ត្រីទាំងនេះ ជាមន្ត្រីប៉ូលិសនៅស្នងការក្រុង ។ អាណាព្យាបាលសិស្ស និស្សិតតែង តែបានសំណូមពររាល់វេទិកាសាធារណៈ ដែលធ្វើឡើងរវាងអាជ្ញាធរនិងសមត្ថកិច្ច ជាមួយប្រជាពលរដ្ឋជាការអនុវត្ដតាម គោលនយោបាយភូមិ-សង្កាត់មានសុវត្ថិភាព ។
ពួកគាត់បានបញ្ជាក់ថា នៅក្នុងភូមិសាស្ត្រខណ្ឌឬស្សីកែវមានទីតាំងលួចបើកភ្នាល់បាល់ស៊ីសងលើអិនធើណេត កត់កន្ទុយលេខ ហ្គេមស៊ីសង ជាច្រើនហើយទីតាំងទាំងនោះអាចតែងតែបង់លុយជាប្រចាំខែឲ្យទៅមេប៉ុស្តិ៍ អធិការ អធិការង ទើបពួកគេអាចបានបើកលេងយ៉ាងរលូនដូច្នេះបាន។
ទាក់ទិននឹងប្រជាពលរដ្ឋបានរិះគន់បណ្តែតបណ្តោយឲ្យបើកហ្គេមបាញ់ត្រីល្បែងស៊ីសង កន្ទុយលេខ ភ្នាល់បាល់លើអិនធើណេត ហ្គេម នៅក្នុងភូមិសាស្ត្រ ខណ្ឌឬស្សីកែវអ្នកសារព័ត៌មានយើងមិនអាចសុំការបញ្ជាក់ពីអាជ្ញាធរខណ្ឌឬស្សីកែវបានឡើយ ។
ប្រជាពលរដ្ឋសូមសំណូមពរដល់លោក នេត សាវឿន អគ្គស្នងការនគរបាលជាតិ និងស្នងការនគរបាលក្រុងភ្នំពេញលោកជួន សុវណ្ណ មេត្តាចាត់វិធានការបង្ក្រាបទីតាំងល្បែង កន្ទុយលេខ ភ្នាល់បាល់លើអិនធើណេត ហ្គេម នៅក្នុងភូមិសាស្ត្រ ខណ្ឌឬស្សីកែវផង ព្រោះសព្វថ្ងៃនេះសម្បូរខ្លាំងណាស់ ហើយក្មេងៗក៏កំពុងសប្បាយនិងភ្នាល់លេងណាស់ដែរ៕ បញ្ញា