ភ្នំពេញ៖ កាលពីវេលាម៉ោង ១០និង៥០នាទីយប់ថ្ងៃពុធ ១០កើតខែបុស្សឆ្នាំរកា ព ស ២៥៦១ត្រូវនឹងថ្ងៃទី ២៧ ធ្នូ ២០១៧ បុរសម្នាក់ជិះម៉ូតូត្រលប់មកពីលេងផ្ទះបងប្អូននៅតំបន់សេដ្ឋកិច្ចពិសេសកំបូល ខណៈជិះមកដល់ពាក់កណ្តាលផ្លូវក៏ត្រូវរថយន្តធំមិនស្គាល់ម៉ាក បុកពេញទំហឹងបណ្តាលអោយដាច់ដៃឆ្វេងនិងជើងឆ្វេង បែកក្បាលស្លាប់ភ្លាមៗនៅកន្លែងកើតហេតុ ស្ថិតនៅតាមបណ្តោយផ្លូវជាតិ៤ មុខបុរីញ៉ូថោន ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនដំបូងគេឃើញ ជនរងគ្រោះជិះម៉ូតូមួយគ្រឿងម៉ាក ស្ស៊ុយស៊ីគីវីវ៉ា ពណ៌ខ្មៅ ពាក់ស្លាកលេខ1AD-4507 តែម្នាក់ឯងតាមបណ្តោយផ្លូវជាតិ៤ ក្នុងទិសដៅពីលិចទៅកើត រីឯរថយន្តបង្កមិនស្គាល់ម៉ាក គ្រាន់តែគេដឹងថាជារថយន្តធុនធំដឹកទំនិញ បើកបរពីកើតទៅលិចក្នុងល្បឿនលឿន ខណៈមកដល់ចំណុចកើតហេតុ ជាកន្លែងងងឹតផ្លូវរួមតូច ទើបរថយន្តបុកម៉ូតូជនរងគ្រោះពេញទំហឹង បណ្តាលអោយជនរងគ្រោះដាច់ដៃឆ្វេងនិងជើងឆ្វេងចេញឆ្អឹងមកក្រៅគួឲ្យញញើត ព្រមទាំងបែកក្បាលស្លាប់បាត់បង់ជីវិតភ្លាមតែម្តង ចំណែករថយន្តបានបន្ថែមល្បឿនរត់បាត់ស្រមោល។
សពជនរងគ្រោះមានឈ្មោះ សឿន ស៊ីម អាយុ ៣៦ឆ្នាំ មុខរបរ កម្មកររោងចក្រ ស្នាក់នៅភូមិកប់គង សង្កាត់ចោមចៅ២ ខណ្ឌពោធិ៍សែនជ័យ ។
ក្រោយកើតហេតុសមត្ថកិច្ចមូលដ្ឋានបានចុះទៅសម្រួលនៅកន្លែងកើតហេតុឆែករកឃើញអត្តសញ្ញាណប័ណ្ណ ដឹងបានទាក់ទងទៅមេភូមិអោយប្រាប់សាច់ញាតិមកមើលច្បាស់ ក្រោយមកទើបសមត្ថកិច្ចចរាចរណ៍ខណ្ឌបានទៅដល់កន្លែងកើតហេតុ ធ្វើឯកសារប្រគល់សពអោយក្រុមគ្រួសារយកទៅធ្វើបុណ្យតាមប្រពៃណី ចំណែកម៉ូតូយកទៅរក្សាទុកនៅខណ្ឌចាំមានឯកសារម៉ូតូគ្រប់ប្រគល់អោយវិញ ៕ បញ្ញា