ភ្នំពេញ៖ទោះបីជាសម្ដេច នាយករដ្ឋមន្ត្រីនៃព្រះរាជរាជាណាចក្រកម្ពុជាបានមានប្រសាសន៍ប្រកាសក្ដែងៗថ្មីៗកន្លែងមកនេះកុំមានបទល្មើសល្បែងសុីសងខុសច្បាប់ក៏ដោយ ផ្ទុយទៅវិញប្រជាពលរដ្ឋក្នុងខណ្ឌឬស្សីកែវនាំគ្នារិះគន់លោក ជា ពិសី អភិបាលខណ្ឌដែលមិនមានវិធានការ បង្ក្រាបទីតាំងហ្គេមបាញ់ត្រី បើកលេងទាំងយប់ទាំងថ្ងៃ មិនខ្លាចមិនញញើត អត់ខ្វល់ពីការល្មើសច្បាប់ ការរិះគន់ពីមហាជនឡើយ ឃើញតែបើកទ្វារចំហររងចាំម៉ូយចូលលេងតែប៉ុណ្ណោះ។
ជាក់ស្ដែងទីតាំងហ្គេមបាញ់ត្រីស្ថិតនៅតាមផ្លូវលេខ៧០ ភូមិចុងខ្សាច់ សង្កាត់ទួលសង្កែ ខណ្ឌឫស្សីកែវនឹងមួយកន្លែងទៀតបើទីតាំងហ្គេមបាញ់ត្រីនៅផ្ទះលេខ៥៦ ផ្លូវលេខ៧០ សង្កាត់ទួលសង្កែទី១ ខណ្ឌឫស្សីកែវ របស់ឈ្មោះ(ឡាយ)មានខ្នងតូចទេ!ប៉ុន្តែឈ្មោះ(ឡាយ)ចេះរត់ការពីក្រោមរហូតដល់លើ!ហើយមកដល់ពេលនេះបើកលេងបានជិត៥ឆ្នាំហើយ ។
តាមប្រភពព័ត៌មានពីប្រជាពលរដ្ឋក្បែរទីតាំងខាងលើ នេះបានឲ្យដឹងថា ផ្ទះហ្គេមបាញ់ត្រីមួយនេះ មិនខ្លាចញញើត ប្រឈមចំពោះមុខច្បាប់ឡើយ គឺចំហរទ្វារទទួលភ្ញៀវ អ្នកញៀនល្បែងចូលលេង ទាំងយប់ទាំងថ្ងៃ បង្កអសន្តិសុខក្នុងមូលដ្ឋានហើយក៏ជាទីតាំងមួយ ផ្តល់ជម្រក ឱកាសដល់ក្រុមអ្នកជួញដូរ ប្រើប្រាស់គ្រឿងញៀនផងដែរ ពុំឃើញមានសមត្ថកិច្ច ឬអាជ្ញាធរណាចុះមកបង្ក្រាបឡើយ ឃើញតែមានអ្នកមកយកលុយ ពីម្ចាស់ហ្គេម ។
ប្រជាពលរដ្ឋតាមដងផ្លូវ៧០ ក្នុងភូមិសាស្រ្តខាងលើនេះបានបន្តទៀតថា មិនមែនមានតែមួយកន្លែងនេះទេនៅមានច្រើនកន្លែងទៀត បើកលេងគគ្រឹកគគ្រេង គ្មានទេអ្នកបង្ក្រាប មានតែអ្នកទៅយកលុយ រាល់យប់រាល់ថ្ងៃ ក៏មានបងតូចបងធំអ្នកញៀន សិស្សសាលាចូលលេង ភ្លេចពីការរៀនសូត្រជាមូលហេតុធ្វើអោយសង្គមអសន្តិសុខកើតមានល្បែងសុីសង គ្រឿងញៀន ដើមចម នាំឲ្យកើតចោរកម្ម បទល្មើសផ្សេងៗ ពលរដ្ឋសំណូមពរ និងទទូចស្នើសុំទៅអាជ្ញាធរ សមត្ថកិច្ច មេត្តាចុះទៅអើតមើល បង្ក្រាបផង ដើម្បីទប់ស្កាត់និងបង្កាបទល្មើសក្នុងមូលដ្ឋាន។
សូមបញ្ជាក់ថា៖ ករណីខាងលើនេះអ្នកសារព័ត៌មាន M C N យើងមិនអាចសុំការបំភ្លឺពីលោក អភិបាលខណ្ឌបានឡើយ៕បញ្ញា