ភ្នំពេញ៖ បុរសចំណាស់ម្នាក់ត្រូវបានម៉ូតូមិនស្គាល់ម៉ាក១គ្រឿងបើកបុកពេញទំហឹង ខណៈដែលគាត់កំពុងដើរឆ្លងផ្លូវបណ្ដាលឲ្យរងរបួសបាក់ជើងស្ដាំម្ខាង។បន្ទាប់មកម៉ូតូបង្កហេតុបានបើករត់គេចខ្លួនបាត់ស្រមោលបន្សស់ទុកតែជនរងគ្រោះខាងលើ ត្រូវបានរថយន្តសង្គ្រោះអង្គភាព៧១១ កងពលតូចលេខ៧០ដឹកយកទៅសង្គ្រោះបន្ទាន់។
គ្រោះថ្នាក់ចរាចរណ៍នោះបានកើត ឡើងកាលពីវេលាម៉ោង១០និង៣៥នាទីព្រឹកថ្ងៃអង្គារ៍ ១រោច ខែមាឃឆ្នាំរកា ព ស ២៥៦១ត្រូវនឹងថ្ងៃទី២ ខែមករា ឆ្នាំ២០១៧ នៅលើកំណាត់ផ្លូវជាតិលេខ៣ ស្ថិតនៅក្នុងភូមិព្រៃព្រីងខាងត្បូង សង្កាត់ចោមចៅ២ ខណ្ឌពោធិ៍សែនជ័យ រាជធានី ភ្នំពេញ។
បុរសរងគ្រោះមានអាយុប្រហែលជាង៦០ឆ្នាំ ជាជនអនាថាមិនត្រូវបានស្គាល់ឈ្មោះឡើយ ចំណែកម៉ូតូដែលបានបើកបុកគាត់បណ្ដាលឲ្យរងរបួសធ្ងន់នោះ ក៏មិនត្រូវបានស្គាល់ម៉ាកនិងស្លាកលេខដែរព្រោះបានបើករត់គេចខ្លួនបាត់។
តាមប្រភពព័ត៌មានពីប្រជាពលរដ្ឋបានឲ្យដឹងថា នៅមុនពេលកើតហេតុគាត់បានឃើញបុរសរងគ្រោះខាងលើដើរឆ្លងផ្លូវជាតិលេខ៣ពីលិចទៅកើត ខណៈនោះជិតផុតទៅហើយ ស្រាប់តែម៉ូតូមិនស្គាល់ម៉ាក១គ្រឿងខាងលើ បើកបរយ៉ាងលឿន ក្នុងទិសដៅពីត្បូងទៅជើងបុកពេញទំហឹងបណ្ដាលឲ្យដួលបោកទៅលើថ្នល់រងរបួសធ្ងន់បាក់ជើងស្ដាំម្ខាង
បន្ទាប់មកម៉ូតូបង្កបើករត់គេចខ្លួនបាត់ស្រមោលតែម្ដង។
ក្រោយពីកើតហេតុគេឃើញកម្លាំងនគរបាលមូលដ្ឋានចុះទៅកន្លែងហេតុដើម្បីធ្វើចរាចរណ៍ព្រមទាំងទំនាក់ទំនងទៅរថយន្តសង្គ្រោះដឹកយកទៅព្យាបាលនៅមន្ទីរពេទ្យ៕៩៨