ភ្នំពេញ ៖ សាកសពបុរសម្នាក់ត្រូវបានគេប្រទះឃើញដេកស្លាប់នៅលើប៉ៅអ៊ីមុខធនាគារមេឃប៊ែងបង្កអោយមានការភ្ញាក់ផ្អើលប្រជាពលរដ្ឋចោមរោមមើល។ហេតុការណ៍នេះបានកើតឡើងនៅថ្ងៃទី ១២ខែធ្នូឆ្នាំ២០១៦ ម៉ោង ២៣:៤៥នាទីយប់ ស្ថិតនៅមុខធនាគារ មេឃប៊ែង ទីតាំងលេខ ៣២៣-៣២៥ ផ្លូវ ២៧៤ ភូមិ ០៧ សង្កាត់ វាលវង់ ខណ្ឌ ៧ មករា។
សាកសពជនរងគ្រោះត្រូវបានគេស្គាល់ឈ្មោះ សុខ ទូច ភេទ ប្រុស អាយុ ៥៣ ឆ្នាំ មុខរបរ សន្តិសុខប្រូតិច ( PK) ទីលំនៅភូមិជាលាឃុំជាលាស្រុកបាឆាយ ខេត្ត កំពង់ចាម ។
តាមការសន្តិដ្ឋានរបស់ លោកឧកញ៉ា វេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យ និងការិយាល័យនគរបាលបច្ចេកទេស វិទ្យាសាស្រ្តរាជធានីភ្នំពេញបានអោយដឹងថា សាកសពជនរងគ្រោះពិតជាស្លាប់ដោយសារគាំងបេះដូងមែន ។
បច្ចុប្បន្ននេះសាកសពជនរងគ្រោះត្រូវបានកម្លាំងនគរបាលមូលដ្ឋានប្រគល់អោយក្រុមគ្រួសារយកទៅធ្វើបុណ្យប្រពៃណីនៅស្រុកកំណើតខេត្តកំពង់ចាម៕សារ៉េត