ភ្នំពេញ៖ សន្តិសុខម្នាក់ត្រូវក្រុមខ្មាន់កាំភ្លើងមានគ្នា៥នាក់ជិះម៉ូតូ៣គ្រឿងប្រដាប់ដោយកាំភ្លើងមិនស្គាល់ម៉ាកបានបាញ់រះចូលក្លឹបកំសាន្ត Epic បណ្តាលអោយរបួសសន្តិសុខម្នាក់ធ្ងន់ធ្ងរ ។ហេតុការណ៍នេះបានកើតឡើងកាលវេលាម៉ោង៣ទាបភ្លឺថ្ងៃទី១៩ ខែធ្នូ ឆ្នាំ២០១៦ នៅក្លឹបកំសាន្ត Epic ស្ថិតនៅក្បែរស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពពត៌មានពីកន្លែងកើតហេតុអោយដឹងថា មុនពេលកើតហេតុគេបានឃើញជនសង្ស័យមានគ្នាប្រហែល៥ទៅ៦នាក់ជិះម៉ូតូ៣គ្រឿង មកឈប់ចំពីមុខក្លឹបកំសាន្តខាងលើ ខណៈនោះមានជនសង្ស័យម្នាក់ក្នុងចំណោមបក្ខពួក៥ទៅ៦នាក់បានដកកាំភ្លើងខ្លីបាញ់ជាច្រើនគ្រាប់សំដៅចូលក្លឹបបណ្តាលអោយរងរបួសសន្តិសុខដែលឈរយាមនៅច្រកទ្វារខាងមុខ ចំជើងស្តាំ និងគ្រាប់ភ្នែកខាងឆ្វេងធ្ងន់ធ្ងរ។បន្ទាប់ពីបាញ់ប្រហាររួចហើយក្រុមជនសង្ស័យបានជិះម៉ូតូគេចខ្លួនបាត់ស្រមោល ។
ក្រោយពេលកើតហេតុគេឃើញសមត្ថកិច្ចមូលដ្ឋានបានចុះទៅកន្លែងកើតហេតុដើម្បីអន្តរាគមន៍ ប៉ុន្តែក្រុមជនសង្ស័យបានរត់គេចខ្លួនបាត់។ចំណែកឯជនរងគ្រោះត្រូវបានក្រុមការងារដឹកបញ្ជូនទៅកាន់ មន្ទីរពេទ្យភ្លាមៗ ។
តាមប្រភពព័ត៌មានពីសមត្ថកិច្ចបានអោយដឹងថាករណីខាងលើនេះជាករណីអ្វីនៅឡើយទេ គ្រាន់តែបង្ហើបអោយដឹងថា អាចជាគំនុំគុំកួនគ្នាទើបឈានទៅដល់ការបាញ់ប្រហារនេះ ។ តែទោះជាយ៉ាងណាក៏ដោយ សមត្ថកិច្ចកំពុងស៊ើបអង្កេតដើម្បីឈានដល់ការចាប់ខ្លួនជនបង្កយកមកផ្តន្ទាទោសដាក់ពន្ធនាគារទៅតាមច្បាប់ ៕សារ៉េត