ភ្នំពេញ៖ចោរប្រដាប់អាវុធមួយក្រុមមានគ្នា៧នាក់ធ្វើសកម្មភាពលួចប្លន់ផ្ទះប្រជាពលរដ្ឋផ្អើលពេញខណ្ឌពោធិ៍សែនជ័យត្រូវកម្លាំងនគរបាលនឹងអាវុធហត្ថសហការគ្នាឡោមព័ទ្ធចាប់ខ្លួនជនសង្ស័យម្នាក់ ខណៈដែលមានជនរងគ្រោះម្នាក់កំពុងសំរាកព្យាបាលមន្ទីរពេទ្យព្រះកុសមៈ ហៅមន្ទីរពេទ្យលោកសង្ឃ។
ហេតុការណ៍នេះបានកើតឡើងកាលពីវេលាម៉ោង៩:០០នាទីយប់ថ្ងៃទី២៦ខែធ្នូឆ្នាំ២០១៦ស្ថិតនៅភូមិព្រៃក្រាយសង្កាត់ស្នោរខណ្ឌពោធិ៍សែនជ័យ។
ជនរងគ្រោះដែលត្រូវជនសង្ស័យធ្វើសកម្មភាពលួចប្លន់នោះមានគ្នា៦នាក់៖
១)ឈ្មោះ កែម កន ភេទប្រុសអាយុ៤៤ឆ្នាំមុខរបរកសិករត្រូវជាឪពុក។ ២)ឈ្មោះ ភី ភឿន ភេទស្រីអាយុ៤៤ឆ្នាំមុខរបរកសិករត្រូវជាម្ដាយនឹងកូនទាំង៣នាក់របស់ជនរងគ្រោះមិនទាន់ត្រូវបានគេស្គាល់ឈ្មោះនៅឡើយទេ។ចំណែកឯអ្នកជិតខាងដែលត្រូវក្រុមជនសង្ស័យបាញ់ប្រហារអោយរបួសធ្ងន់ក៏មិនទាន់ដឹងឈ្មោះនៅឡើយ( អ្នកទាំងនេះស្នាក់នៅក្នុងភូមិកើតហេតុខាងលើ)រីឯជនសង្ស័យម្នាក់ក្នុងចំណោមបក្ខពួក៧នាក់មិនទាន់ស្គាល់អត្តសញ្ញាណនូវឡើយទេ។
តាមប្រភពពត៌មានពីជនរងគ្រោះបានអោយដឹងថានៅមុនពេលកើតហេតុ គាត់ព្រមទាំងក្រុមគ្រួសារកំពុងអង្គុយមើលទូរទស្សន៍នៅក្នុងផ្ទះរបស់គាត់ ខណៈនោះស្រាប់តែឃើញជនសង្ស័យមួយក្រុមមានគ្នា៧នាក់ប្រដាប់ដោយអាវុធA Kចំនួន៦ដើមដើរចូលមកក្នុងផ្ទះរបស់គាត់ រួចគំរាមកំហែងដល់អាយុជីវិតគាត់និងក្រុមគ្រួសាររបស់គាត់ ធ្វើឲ្យមានការភ្ញាក់ផ្អើលភ័យខ្លាចក៏បណ្ដែតបណ្ដោយឲ្យក្រុមជនសង្ស័យទាំងនោះយកទ្រព្យសម្បត្តិតាមចិត្ត។បន្ទាប់មកអ្នកជិតខាងម្នាក់ទៀតឮសូរសំលេងខ្លាំងៗរត់មកមើលក៏ត្រូវក្រុមជនសង្ស័យបាញ់ប្រហារបណ្ដាលឲ្យរងរបួសធ្លាយពោះវៀននឹងដៃត្រូវសាច់ញាតិរបស់ជនរងគ្រោះដឹកយកទៅព្យាបាលនៅមន្ទីរពេទ្យព្រះកុសមៈហៅមន្ទីរពេទ្យលោកសង្ឃភ្លាមៗផងដែរ។
តាមប្រភពដដែលបានបន្ដទៀតថាក្រោយពីប្លន់ប្រដាប់អាវុធរួច កម្លាំងនគរបាលសហការជាមួយកម្លាំងអាវុធហត្ថខណ្ឌពោធិ៍សែនជ័យចុះមកដល់កន្លែងកើតហេតុភ្លាមៗមិនខ្លាចបាត់បង់ជីវិតដោយប្ដូរជាមួយក្រុមជនសង្ស័យប្រដាប់ដោយអាវុធស្ទើរគ្រប់ដៃ រហូតឈានដល់ឡោមព័ទ្ធចាប់បក្ខពួកជនសង្ស័យម្នាក់ក្នុងចំណោមបក្ខពួក៧នាក់ថែមទៀតផង។
តាមប្រភពដដែលបានបន្ដទៀត សំភារៈដែលជនសង្ស័យធ្វើសកម្មភាពប្លន់យកទៅនោះមាន៖ លុយចំនួន៥០០ដុល្លារ ខ្សែកផ្លាទីនចំនួន៥កន្លះនិងទ្រព្យសម្បត្តិបន្តិចបន្តួចទៀត។
បច្ចុប្បន្ននេះជនសង្ស័យម្នាក់ក្នុងចំណោមបក្ខពួក៧នាក់ត្រូវកម្លាំងនគរបាលខណ្ឌពោធិ៍សែនជ័យនាំមកសាកសួរនៅអធិការខណ្ឌដើម្បីស្វែងរកចាប់បក្ខពួកយកមកផ្ដន្ទាទោសដាក់ពន្ធនាគារទៅតាមច្បាប់៕សារ៉េត