ភ្នំពេញ ៖មានករណីហិង្សាមួយ ដោយនារីម្នាក់បានជះទឹកអាស៊ីត ទៅលើបុរសម្នាក់ និងស្ត្រីម្នាក់បណ្ដាលឲ្យរងរបួស នៅល្ងាចថ្ងៃទី២ ខែមករា ឆ្នាំ២០១៧នេះ ត្រង់ចំណុចក្រុមទី៣ ផ្លូវបេតុង ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ
សាក្សីឲ្យដឹងថា នៅមុនពេលកើតហេតុ ជនសង្ស័យឈ្មោះ ប៉ាច ចាន់សេរីរដ្ឋ ភេទស្រី អាយុ២៥ឆ្នាំ ជនជាតិខ្មែរ មុខរបរនៅផ្ទះ អាសយដ្ឋានស្នាក់នៅផ្ទះជួល ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ដែលធ្លាប់មានទំនាក់ទំនងស្នេហាជាមួយជនរងគ្រោះ ឈ្មោះ គា សំណាង ភេទប្រុស អាយុ២២ឆ្នាំ មុខរបរជាងដែក ស្នាក់នៅផ្ទះជួល ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។តែក្រោយមក ជនរងគ្រោះ គា សំណាង បានទៅភ្ជាប់ពាក្យជាមួយនារីម្នាក់ទៀត ដែលជាជនរងគ្រោះដែរនោះមានឈ្មោះ សាន សុខា ភេទស្រី អាយុ១៨ឆ្នាំ ជាសិស្សសាលាវិចិត្រសិល្បៈ មានទីលំនៅក្នុងសង្កាត់ទួលសង្កែ ខណ្ឌឫស្សីកែវ ។
នៅថ្ងៃខែកើតហេតុជនសង្ស័យបានជិះម៉ូតូឌុប ចេញពីផ្ទះជួល ក្នុងគោលបំណងទៅជួបជនរងគ្រោះ គា សំណាង នៅខណ្ឌព្រែកព្នៅ លុះពេលមកដល់ជនសង្ស័យបានជួបជាមួយជនរងគ្រោះ គា សំណាង និងសាន សុខា ដូចបំណង។ពេលនោះនារីជាជនសង្ស័យ បានឲ្យជនរងគ្រោះទាំងពីរ ជិះម៉ូតូ ឌុបជូននាងទៅផ្ទះជួលវិញ។ លុះដល់ចំណុចកើតហេតុ ជនសង្ស័យបានដកដបទឹកអាស៊ីត ពីកាបូបស្ពាយ ហើយជះទៅលើជនរងគ្រោះ ទាំងពីរបណ្ដាលឲ្យរបួសធ្ងន់ ដោយជនរងគ្រោះ គា សំណាង របួសថ្ងាស ទ្រូង និងដៃខាងឆ្វេង រីឯជនរងគ្រោះ សាន សុខា រងរបួសពេញផ្ទៃមុខ និងទ្រូង បន្ទាប់មកជនរងគ្រោះទាំងពីរត្រូវបានដឹកបញ្ជូនទៅកាន់មន្ទីពេទ្យ ព្រះកុសមៈ ដើម្បីធ្វើការព្យាបាល។
ឯជនសង្ស័យត្រូវនគរបាលប៉ុស្ដិ៍ភ្នំពេញថ្មី ឃាត់ខ្លួនយកមកសាកសួរនៅ អធិការដ្ឋាន នគរបាលខណ្ឌ សែនសុខ ដើម្បីកសាងសំណុំរឿងចាត់ការទៅតាមនិតិវិធី ៕ អូន ធួក
