ភ្នំពេញ៖បុរស២នាក់ជិះម៉ូតូមួយគ្រឿងចេញពីហូបការគេធ្វើដំណើរតាមបណ្ដោយផ្លូវបេតុងបំរុងបត់ឆ្លង ត្រូវរថយន្តមិនស្គាល់ម៉ាកបុកពេញទំហឹងបណ្ដាលឲ្យស្លាប់ម្នាក់រងរបួសស្រាលម្នាក់។ហេតុការណ៍នេះបានកើតឡើងកាលពីវេលាម៉ោង៩:៣០នាទីយប់ថ្ងៃទី១០ខែមករាឆ្នាំ២០១៧ស្ថិតនៅតាមបណ្ដោយផ្លូវទំនប់កប់ស្រូវក្នុងភូមិស្រែតេជៈសង្កាត់សំរោងក្រោមខណ្ឌពោធិ៍សែនជ័យ។
សាកសពជនរងគ្រោះត្រូវបានគេស្គាល់ឈ្មោះ ភិន ចាន់សុភា អាយុ៣៥ឆ្នាំ មុខរបរលក់ផ្លែឈើនៅផ្សាពោធិចិនតុងស្នាក់នៅភូមិប្រប្រកត្បូងស្រុកកំណើតនៅស្រុកថ្មគោលខេត្តបាត់ដំបងនិងអ្នករួមដំណើរឈ្មោះ ហែល សុភក្ត្រ អាយុ៣៤ឆ្នាំស្នាក់នៅភូមិប្រប្រកជើងសង្កាត់កាកាបខណ្ឌពោធិ៍សែនជ័យ។ដោយឡែករថយន្តបង្កហេតុមិនត្រូវបានគេស្គាល់អត្តសញ្ញាណនោះឡើយដោយបើករត់គេចខ្លួនបាត់ស្រមោល។
តាមប្រភពព័ត៌មានពីកន្លែងកើតហេតុបានប្រាប់អោយដឹងថា នៅមុនពេលកើតហេតុគេឃើញជនរងគ្រោះនិងអ្នករួមដំណើរម្នាក់ទៀតជិះម៉ូតូមួយគ្រឿងម៉ាកហុងដាសេ១២៥ពណ៌ខ្មៅសេរី២០១៥ពាក់ស្លាកលេខ ភ្នំពេញ1 Cz 7525ទៅចូលរួមកម្មវិធីអាពាហ៍ពិពាហ៍របស់មិត្តភ័ក្ដិនៅម្តុំភ្នំប្រសិទ្ធិ៍។លុះចូលរួមកម្មវិធីហើយក៏ជិះម៉ូតូវិលត្រឡប់មកផ្ទះវិញតាមបណ្ដោយផ្លូវបេតុងក្នុងទិសដៅពីលិចទៅកើតបត់ឡើងលើផ្លូវទំនប់កប់ស្រូវស្រាប់តែមានរថយន្តមួយគ្រឿងមិនស្គាល់ម៉ាកធ្វើដំណើរតាមបណ្ដោយផ្លូវទំនប់កប់ស្រូវក្នុងទិសដៅពីជើងទៅត្បូងយ៉ាងលឿនបុកម៉ូតូជនរងគ្រោះចំពាក់កណ្ដាលបណ្ដាលឲ្យខ្ទាតមនុស្សចេញបោកទៅនឹងថ្នល់ស្លាប់បាត់បង់ជីវិតម្នាក់នឹងម្នាក់ទៀតសន្លប់មួយសន្ទុះទើបដឹងខ្លួនចំណែកឯម៉ូតូហោះចំងាយប្រហែលជា៣០ម៉ែត្រ។ដោយឡែកអ្នកបើកបររថយន្តបង្កហេតុមិនបានឈប់នៅកន្លែងកើតហេតុទេថែមទាំងបន្ថែមល្បឿនបើករត់គេចខ្លួនបាត់ស្រមោលសូន្យឈឹងតែម្ដង។
ក្រោយពេលកើតហេតុគេឃើញនគរបាលមូលដ្ឋានបានចុះទៅកន្លែងកើតហេតុដើម្បីធ្វើចរាចរណ៍និងទំនាក់ទំនងហៅរថយន្តសង្គ្រោះដឹកជនរងគ្រោះដែលសន្លប់ទៅមន្ទីរពេទ្យ។រីឯសាកសពជនរងគ្រោះត្រូវបាននគរបាលខណ្ឌពោធិ៍សែនជ័យប្រគល់ទៅអោយក្រុមគ្រួសារយកមកធ្វើបុណ្យតាមប្រពៃណី។ប៉ុន្តែម៉ូតូជនរងគ្រោះត្រូវបាននគរបាលខណ្ឌយកមករក្សាទុករងចាំក្រុមគ្រួសារនៃសពយកឯកសារទទួលទៅវិញ៕សារ៉េត