ភ្នំពេញ៖ជនសង្ស័យចំនួន២នាក់ត្រូវកម្លាំងអាវុធហត្ថខណ្ឌពោធិ៍សែនជ័យតាមដានស្រាវជ្រាវរហូតដល់ចាប់ឃាត់ខ្លួនបាន បន្ទាប់ពីក្រុមទាំងនេះធ្វើសកម្មភាពប្លន់រួចចំនួនពីរថ្ងៃនៅទឹកដីខណ្ឌទួលគោក។ហេតុការណ៍បង្ក្រាបនេះបានធ្វើឡើងកាលពីវេលាម៉ោង១១:៣០នាទីព្រឹកថ្ងៃទី១៨ខែមករាឆ្នាំ២០១៧ស្ថិតនៅភូមិត្រពាំងល្វាសង្កាត់កាកាបខណ្ឌពោធិ៍សែនជ័យ។
តាមប្រភពព័ត៌មានមួយបានបង្ហើបឲ្យដឹងថា ជនសង្ស័យដែលកម្លាំងអាវុធហត្ថខណ្ឌពោធិ៍សែនជ័យបង្ក្រាបនេះ កាលពីយប់ថ្ងៃទី១៦ខែមករាឆ្នាំ២០១៧ស្ថិតនៅហាង ខារ៉ាអូខេសម្រិតពេជ្រក្នុងសង្កាត់បឹងកក់២ខណ្ឌទួលគោករាជធានីភ្នំពេញកន្លងមកនេះបានធ្វើសកម្មភាពប្លន់ម៉ូតូមួយគ្រឿងរួចយកមកលាក់ទុកក្នុងទឹកដីខណ្ឌពោធិ៍សែនជ័យ។រហូតដល់កម្លាំងជំនាញអាវុធហត្ថខណ្ឌធ្វើការតាមដានស្រាវជ្រាវឈានដល់ចាប់បានជនសង្ស័យចំនួន២នាក់ដោយដកហូតកាំភ្លើងខ្លីម៉ាក54មានគ្រាប់ចំនួន៧ម៉ូតូមួយគ្រឿង ម៉ាកហ្សូមើពណ៌សលាយខ្មៅគ្មានស្លាកលេខ ព្រមទាំងទូរស័ព្ទដៃមួយគ្រឿងទៀតផង។
បច្ចុប្បន្ននេះជនសង្ស័យកំពុងសាកសួរនិងកសាងសំណុំរឿងបញ្ជូនទៅទៅកាន់បញ្ជាការដ្ឋានកងរាជអាវុធហត្ថរាជធានីដើម្បីចាត់ការបន្ត៕សារ៉េត