ភ្នំពេញ៖ជនសង្ស័យម្នាក់ក្នុងចំណោមបក្ខពួក២នាក់ធ្វើសកម្មភាពលួចឆក់ទូរស័ព្ទរបស់នារីជនជាតិចិនម្នាក់មិនបានសម្រេចត្រូវប្រជាពលរដ្ឋស្វាគមន៍មួយដៃមួយជើងទ្រមខ្លួនទើបប្រគល់អោយកម្លាំងនគរបាល។ហេតុការណ៍នេះបានកើតឡើងកាលពីវេលាម៉ោង២២:០០នាទីយប់ថ្ងៃទី២៩ខែ មករាឆ្នាំ២០១៧ស្ថិតនៅតាមបណ្ដោយផ្លូវលេខ១៥៤កែងផ្លូវលេខ១១ភូមិ៧សង្កាត់ផ្សារកណ្តាលទី១ខណ្ឌដូនពេញ ។
ជនរងគ្រោះឈ្មោះ GUO. LU ភេទស្រីអាយុ៣៣ឆ្នាំ ជនជាតិចិន មុខរបរទេសចរណ៍ស្នាក់នៅសណ្ឋាគារឌី អេតផ្លូវលេខ១០៦សង្កាត់វត្តភ្នំខណ្ឌដូនពេញ កាន់លិខិតឆ្លងដែនលេខE 24510027។ សំភារះបាត់បង់ទូរស័ព្ទដៃម៉ាកអាយហ្វូន6ពណ៌ទឹកមាស(ត្រូវបានជនសង្ស័យជាបក្ខពួកយករត់គេចខ្លួនបាត់)។ ចំណែកឯជនសង្ស័យដែលត្រូវឃាត់ខ្លួនឈ្មោះ វ៉ាន់ ណាសុភ័ក្រ្តទីន ភេទប្រុស អាយុ១៨ឆ្នាំ ជនជាតិខ្មែរ មុខរបរ សិស្សសាលាវត្តកោះ ស្នាក់នៅផ្ទះ២៣១អឺ៤ផ្លវលេខ៩៣សង្កាត់អូឬស្សទី៤ខណ្ឌ៧មករា។វត្ថុតាងចាប់យកបានម៉ូតូមួយគ្រឿងម៉ាកហុងដាC125ពណ៌ខ្មៅពាក់ស្លាកលេខភ្នំពេញ1FW9694ជារបស់ជនសង្ស័យជិះធ្វើសកម្មភាព។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញនារីរងគ្រោះដើរលេងតាមផ្លូវជាមួយមិត្តភ័ក្តិ ខណៈនោះស្រាប់តែឃើញជនសង្ស័យចំនួន២នាក់ជិះម៉ូតូមួយគ្រឿងសំដៅទៅអែបនារីរងគ្រោះ រួចធ្វើសកម្មភាពលួចឆក់ទូរស័ព្ទដៃរបស់នារីរងគ្រោះ។បន្ទាប់មកបានប្រជាពលរដ្ឋដែលនៅក្បែរកន្លែងកើតហេតុឃើញស្រែកផ្អើលឆោឡោដេញចាប់រហូតបានជនសង្ស័យម្នាក់រួមទាំងម៉ូតូ រួចស្វាគមន៍មួយដៃមួយជើងម្នាក់ស្ទើរសន្លប់ទើបប្រគល់អោយកម្លាំងនគរបាលមូលដ្ឋានយកទៅព្យាបាលនៅមន្ទីរពេទ្យកាល់ម៉ែត្រ។ដោយឡែកបក្ខពួកជនសង្ស័យម្នាក់ទៀតបានយកទូរស័ព្ទរបស់នារីរងគ្រោះរត់គេចខ្លួនបាត់ស្រមោល។
បច្ចុប្បន្នជនសង្ស័យកំពុងឃាត់ខ្លននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងតាមនិតិវិធី៕សារ៉េត