ភ្នំពេញ ៖ មានការភ្ញាក់ផ្អើលមួយកើតឡើងកាលពីវេលាម៉ោង៦ និង៣០នាទីព្រលប់ ថ្ងៃទី៧ ខែកុម្ភៈ ឆ្នាំ២០១៧ តាមបណ្តោយផ្លូវលេខ១០៦ ចំណុចជាប់ផ្សាររាត្រី ស្ថិតក្នុងសង្កាត់វត្តភ្នំ ខណ្ឌដូនពេញ បន្ទាប់ពីមានបុរសអ្នករត់រ៉ឺម៉កម្នាក់ខ្យល់គរដួលស្លាប់ ខណៈកំពុងបណ្តើររ៉ឺម៉កម៉ូតូ ។
ជនរងគ្រោះត្រូវបានគេឈ្មោះ ប៉ុល កុសល ហៅ យ៉ុន ភេទប្រុស អាយុ៤៥ឆ្នាំ មុខរបរអ្នករត់រ៉ឺម៉កម៉ូតូ ស្នាក់នៅជិតផ្សាររាត្រី សង្កាត់វត្តភ្នំ ខណ្ឌដូនពេញ មានស្រុកកំណើតនៅឃុំដំបូលខ្ពស់ ស្រុកអង្គរជ័យ ខេត្តកំពត ។
សាក្សីបានឲ្យដឹងថា មុនពេលកើតហេតុគេឃើញគាត់បណ្តើររ៉ឺម៉កម៉ូតូរបស់គាត់ ស្រាប់តែ មួយសន្ទុះក្រោយមកឃើញគាត់ដេកដួលសន្លប់បាត់ទៅហើយ ភ្លាមៗនោះប្រជាពលរដ្ឋ និងអ្នកលក់ដូរនៅជិតកន្លែងកើតហេតុបានជួយសង្គ្រោះ តែជាអកុសលគាត់បានដាច់ខ្យលស្លាប់បាត់ទៅហើយ ។ ជនរងគ្រោះបានស្លាប់ដោយសារខ្យល់គដួលដាច់សរសៃឈាម ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចប្រគល់ឲ្យប្អូនប្រុសបង្កើតរបស់ជនរងគ្រោះឈ្មោះ ប៉ុល អែម អាយុ៣៤ឆ្នាំ មុខរបរអ្នករត់រ៉ឺម៉កម៉ូតូ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ យកទៅបុណ្យតាមប្រពៃណីនៅស្រុកកំណើតខេត្តកំពត ៕
អូន ធួក
