ខេត្តកណ្ដាល៖ ឪពុកម្ដាយខិតខំចិញ្ចឹមបែរបាច់ថែរក្សាតាំងពីតូចក្រូចឆ្មារ រហូតបញ្ជូនទៅសាលារៀនដើម្បីអោយចេះដឹងនឹងគេ លុះធំដឹងក្ដីស្ដីបន្ទោសបន្តិចបន្តួចអោយមានអនាគតល្អភ្លឺស្វាងខឹងចងកសម្លាប់ខ្លួនឯងនៅក្នុងបន្ទប់។ហេតុការណ៍នេះបានកើតឡើងកាលពីវេលាម៉ោង៨:៣០នាទីព្រឹកថ្ងៃទី១៧ ខែកុម្ភះឆ្នាំ២០១៧ស្ថិតនៅភូមិថ្មី២ សង្កាត់តាខ្មៅ ក្រុងតាខ្មៅខេត្តកណ្តាល។
ជនរងគ្រោះឈ្មោះ ជា សុភីរក្ស ភេទ ប្រុសអាយុ ២៤ឆ្នាំជនជាតិខ្មែរមានទីលំនៅភូមិ ថ្មី២សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ:នៅផ្ទះ។
តាមការសាកសួរបំភ្លឺពីឪពុករបស់ជនរងគ្រោះបានអោយដឹងថានៅមុនពេលកើត កាលពីថ្ងៃទី១៦ខែកុម្ភៈឆ្នាំ២០១៧វេលាម៉ោងប្រហែល ១៨: ០០នាទី ឈ្មោះ ហុង សុភាព ភេទ ស្រី ត្រូវជាម្តាយរបស់ជនរងគ្រោះ បាននិយាយប្រាប់អោយជនរងគ្រោះគួរតែទៅរកការងារធ្វើហើយ ព្រោះខ្លួនឈប់រៀនយូរហើយតែជនរងគ្រោះមិនចង់ធ្វើការទេ។ លុះព្រឹកឡើងនៅថ្ងៃទី១៧ខែឆ្នាំដដែល ខ្លួនបានចេញពីផ្ទះទៅលក់នំនៅផ្សារតាខ្មៅចាស់ដូចរាល់ដង ដោយជនរងគ្រោះនៅផ្ទះជាមួយប្អូនស្រីរបស់គេ។ រហូតដល់ម៉ោង០៨និង៣០នាទីកូនស្រីរបស់គាត់បានតេទូរសព្ទ័ប្រាប់ថា បងប្រុសបាន(ចងក)ក្នុងបន្ទប់ដេករបស់ខ្លួនស្លាប់បាត់ហើយ។បន្ទាប់មកក៏បានរាយការណ៍ជូនសមត្ថកិច្ចអោយចុះមកពិនិត្យតែម្តង។
ក្រោយពីកើតហេតុនគរបាលមូលដ្ឋានបានចុះទៅកន្លែងកើតហេតុ រួចទំនាក់ទំនងជាមួយគ្រូពេទ្យជំនាញព្រមទាំងអាជ្ញាធរពាក់ព័ន្ធមកដើម្បីធ្វើការពិនិត្យកន្លែងកើតនិងសាកសព។
តាមប្រភពពត៌មានពីលោកគ្រូពេទ្យជំនាញបច្ចេកទេសខេត្តកណ្តាល និងសមត្ថកិច្ចជំនាញបច្ចេកខេត្តកណ្តាល សហការជាមួយសមត្ថកិច្ចជំនាញបច្ចេកទេសក្រុងតាខ្មៅ ព្រមទាំងអាជ្ញាធរដែលពាក់ព័ន្ធបានសន្និដ្ឋានថាជនរងគ្រោះពិតជាបានស្លាប់ដោយសារធ្វើអត្តឃាត(ចងក)ដោយខ្លួនឯងប្រាកដមែន ដោយគ្មានស្លាកស្នាមអ្វីគួរអោយកត់សំគាល់ឡើយ។ បន្ទាប់ពីការពិនិត្យចប់សព្វគ្រប់សាកសពត្រូវបានកម្លាំងនគរបាលក្រុងតាខ្មៅប្រគល់អោយក្រុមគ្រួសារដើម្បីយកទៅធ្វើបុណ្យតាមប្រពៃណី៕សារ៉េត