ខេត្តកណ្តាល៖ បុរសម្នាក់ជាជនប្រមុឹកសុីផឹកប្រចាំថ្ងៃមិនខ្ចីធ្វើការ ឃើញគេផឹកស្រាជុំគ្នាទៅសុំលុយទិញស្រាគេអោយស្រាបៀរមួយហើយសុំថែមទៀតបង្កជាហឹង្សាវាយគ្នាដួលមុតនឹងអំបែងថ្មរងរបួសធ្ងន់ពេលដឹកទៅមន្ទីរពេទ្យស្លាប់បាត់បង់ជីវិត។ហេតុការណ៍នេះបានកើតឡើងកាលពីវេលាម៉ោង១៥:១០នាទីរសៀលថ្ងៃទី២៧ខែកុម្ភះឆ្នាំ២០១៧ស្ថិតនៅភូមិត្រយឹង ឃុំពើក ស្រុកអង្គស្នួល ខេត្តកណ្តាល។
ជនរងគ្រោះត្រូវបានគេស្គាល់ឈ្មោះ នុត ង៉ែត ភេទប្រុស អាយុ៤៥ឆ្នាំជនជាតិខ្មែរ មុខរបរកសិករ ទីលំនៅបច្ចុប្បន្ននៅភូមិត្រយឹង ឃុំពើក ស្រុកអង្គស្នួល ខេត្តកណ្តាល ។ចំណែកឯជនសង្ស័យឈ្មោះ សួន ប្រុសភេទប្រុស អាយុ៤៣ឆ្នាំ ជនជាតិខ្មែរ មុខរបរជាងតភ្លើង ទីលំនៅបច្ចប្បន្ននៅភូមិត្រយឹង ឃុំពើក ស្រុកអង្គស្នួល ខេត្តកណ្តាល។
តាមប្រភពពត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ ជនសង្ស័យនិងអ្នកជិតខាងកំពុងតែផឹកស្រាបៀនៅចំណុចកើតហេតុ ពេលនោះជនរងគ្រោះដែលជាមនុស្សផឹកស្រាជាប្រចាំក៏ដើរចូលទៅសុំលុយពីជនសង្ស័យដើម្បីទិញស្រាផឹក ។ តែជនសង្ស័យថាគ្មានលុយទេ ក៏ឲ្យស្រាបៀមួយកំប៉ុង ហើយផឹកអស់បានសុំថែមទៀត ខណៈនោះជនសង្ស័យដេញឲ្យចេញតែជនរងគ្រោះមិនចេញ បានទាក់ពាក្យសម្តីរហូតដល់ប្រតាយប្រតប់គ្នាទៅវិញទៅមក ទើបជនសង្ស័យវាយជនរងគ្រោះដោយដៃទទេចំនួនពីរដៃចំផ្ទៃមុខបណ្តាលឲ្យដួលផ្ងាកក្រោយបោកក្បាលទៅនឹងអំបែងឥដ្ឋបែកក្បាលចេញឈាម។ ហើយក៏ត្រូវបានក្រុមគ្រួសារយកទៅមន្ទីរពេទ្យបង្អែកស្រុកអង្គស្នួលព្យាបាលដេររបួសក្បាល០៣ថ្នេរ ។លុះដល់ម៉ោង២៣:០០នាទី នាថ្ងៃដដែលលោកគ្រូពេទ្យឃើញសភាពធ្ងន់ធ្ងរក៏បញ្ជូនបន្តទៅមន្ទីរពេទ្យលោកសង្ឃនៅឯភ្នំពេញ ហើយជនរងគ្រោះក៏បានស្លាប់នៅមន្ទីរពេទ្យ។
ក្រោយពីកើតហេតុនគរបាលមូលដ្ឋានបានចុះទៅឃាត់ខ្លួនជនសង្ស័យមកកាន់នគរបាលប៉ុស្ដិ៍សាកសួរនិងកសាងសំណុំរឿងបញ្ជូនទៅអធិការដ្ឋានចាត់ការបន្តតាមនីតិវិធី៕សារ៉េត