សៀមរាប៖ អគ្គិភ័យបានបំផ្លាញផ្សារពោធិលង្ការ ដែលជាផ្សារឯកជនមានតូបលក់ដូរ តូចនិងធំប្រមាណជិត១០០តូប អស់ទ្រព្យសម្បត្តិយ៉ាងច្រើនបណ្តាលមកពីឆ្លងចរន្តអគ្គិសនីកាលពីវេលាម៉ោងជាង១រំលងអាធ្រាត្រ ឈានចូលថ្ងៃទី២ ខែមីនា ឆ្នាំ២០១៧ ស្ថិតនៅក្នុងភូមិបឹងដូនប៉ា សង្កាត់ស្លក្រាម ក្រុង.ខេត្ត សៀមរាប។
អធិការនគរបាលក្រុងសៀមរាប លោកវរសេនីយ៍ឯក ទិត្យ ណារ៉ុង បានថ្លែងឲ្យដឹងថា ហេតុការណ៍ឆាបឆេះនេះ គឺបណ្តាលមកពីឆ្លងចរន្តអគ្គិសនី មកពីតូបលក់គ្រឿងសំណង់ ទើបបន្តឆេះរាលដាលដល់តូបផ្សេងទៀត។ សរុបតូបដែលឆេះទាំងស្រុងមានចំនួន៨៥តូប ក្នុងនោះសម្ភារៈដែលនៅក្នុងតូប ក៏ឆេះអស់ទាំងស្រុងផងដែរ។ ប៉ុន្តែនៅពុំទាន់អាចប៉ាន់ប្រមាណអំពីទំហំទឹកប្រាក់ នៃការខូចខាតបាននៅឡើយទេ។
សមត្ថកិច្ចបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត រថយន្តពន្លត់អគ្គិភ័យរបស់កងរាជអាវុធហត្ថខេត្ត និងរថយន្តរបស់អាជ្ញាធរអប្សរាសរុប ១២គ្រឿង ដោយប្រើប្រាស់ទឹកជាច្រើនគ្រឿង ៕សម្បត្តិ
