ខេត្តកណ្ដាល៖ ស្រីប្រុស២នាក់ត្រូវកម្លាំងនគរបាលប៉ុស្តិ៍សំពៅពូនធ្វើការតាមដានស្រាវជ្រាវរហូតចាប់ឃាត់ខ្លួនយកមកផន្ទាទោសដាក់ពន្ធនាគារទៅតាមច្បាប់។ហេតុការណ៍នេះបានកើតឡើងកាលពីថ្ងៃទី២២ ខែមីនា ឆ្នាំ២០១៧ វេលាម៉ោង១១ និង៣០នាទីព្រឹកស្ថិតនៅភូមិព្រែកសឹង ឃុំសំពៅពូន ស្រុកកោះធំ ខេត្តកណ្ដាល។
ជនសង្ស័យទាំងពីរនាក់ត្រូវបានគេស្គាល់៖
១-ឈ្មោះ ឃឹម ខេម៉ា (ហៅ ស្រីពេជ្រ) ភេទស្រី អាយុ ៣០ឆ្នាំ ជនជាតិខ្មែរ ស្នាក់នៅសង្កាត់ផ្សារដើមថ្កូវខណ្ឌចំការមន រាជធានីភ្នំពេញមុខរបរ លក់ថ្នាំញៀន។២-ឈ្មោះ សេង សុងហ៊ី (ហៅ ចន្ឋី) ភេទប្រុស អាយុ ៣០ឆ្នាំ ជនជាតិខ្មែរ ទីលំនៅភូមិក្បាលកោះ ឃុំឈើខ្មៅ ស្រុកកោះធំ ខេត្ត កណ្តាល មុខរបរ បុគ្គលិកកាស៊ីណូក្រោន។
តាមប្រភពព័ត៌មានពីកម្លាំងនគរបាលស្រុកកោះធំម្នាក់សុំមិនបញ្ចេញឈ្មោះបានឲ្យដឹងថា នៅមុនពេលឈានដល់ការឃាត់ខ្លួនជនសង្ស័យកម្លាំងនគរបាលប៉ុស្តិ៍សំពៅពូនបានធ្វើការតាមដានស្រាវជ្រាវល្បាតនៅក្នុងមូលដ្ឋានដើម្បីការពារសុវត្ថិភាពជូនប្រជាពលរដ្ឋកុំឲ្យមានបទល្មើសកើតឡើង ខណៈនោះបានទទួលព័ត៌មានពីមហាជនល្អថា មានសកម្មភាពលក់ និងចែកចាយគ្រឿងញៀនយ៉ាងសកម្មនៅចំណុចភូមិព្រែកសឹងឃុំសំពៅពូនស្រុកកោះធំខេត្តកណ្ដាល។បន្ទាប់ពីទទួលបានព័ត៌មានភ្លាមនគរបាលជំនាញសហការជាមួយកម្លាំងនគរបាលប៉ុស្ដិ៍សំពៅពូន ចុះស្រាវជ្រាវរហូតដល់ចំណុចកើតហេតុខាងលើ ក៏បានជួបមុខសញ្ញាសង្ស័យ ០១នាក់ ឈ្មោះ ឃឹម ខេម៉ា ភេទស្រី អាយុ ៣០ឆ្នាំ និងដកហូតបានថ្នាំញៀនចំនួន ៤២កញ្ចប់ក្នុងនោះ(០២កញ្ចប់ធំ, ៤០កញ្ចប់តូច) ដែលរកឃើញមាននៅក្នុងកាបូបជាប់និងខ្លួនរបស់ ឃឹម ខេម៉ា។រួចសាកសួរភ្លាមៗក៏បន្តឃាត់ខ្លួនបានជនសង្ស័យជាបក្ខពួក០១ទៀត ឈ្មោះ សេង សុងហ៊ី ភេទប្រុស នៅចំណុចភូមិជ្រៃធំ ឃុំសំពៅពូន ស្រុកកោះធំ ។
តាមចំលើយសារភាពរបស់ជនសង្ស័យឈ្មោះ ឃឹម ខេម៉ា បានសារភាពថា ថ្នាំញៀនចំនួន ៤០កញ្ចប់តូច និង ០២កញ្ចប់ធំ ខាងលើនេះគឺពិតជារបស់ខ្លួនបានទិញយកមកទុកលក់ និងចែកចាយបន្តប្រាកដមែន ។ ចំណែកជនសង្ស័យ សេង សុងហ៊ី បានសារភាពដែរថា រូបខ្លួនពិតជាបានទិញថ្នាំញៀន ០៣កញ្ចប់តូច ពីឈ្មោះ ឃឹម ខេម៉ា យកទៅជក់ និងលក់បន្តដែរ។
បច្ចុប្បន្ននេះជនសង្ស័យទាំងពីរនាក់ត្រូវកម្លាំងនគរបាលប៉ុស្តិ៍សំពៅពូនកសាងសំណុំរឿងបញ្ជូនទៅកាន់អធិការដ្ឋាននគរបាលស្រុកកោះធំដើម្បីចាត់ការតាមផ្លូវច្បាប់៕សារ៉េត