ភ្នំពេញ៖តារាសម្ដែងល្បីមួយរូបឈ្មោះ កញ្ញា ពេជ្រ អាវីហ្សា បានបើករថយន្តដ៏ទំនើបមួយគ្រឿងទៅបុកជាមួយម៉ូតូកូនទាដែលជិះដោយបុរស២នាក់ បណ្ដាលឲ្យរងរបួសធ្ងន់ និងខូចខាតម៉ូតូយ៉ាងដំណំគៀបក្រោមកង់រថយន្តទៅ មុខមិន។ហេតុការណ៍នេះ បានកើតឡើងនៅវេលាម៉ោង២:១០នាទី អធ្រាត្រឆ្លងចូលថ្ងៃទី២៤ ខែមីនា ឆ្នាំ២០១៧ តាមបណ្ដោយផ្លូវសុធារស ស្ថិតក្នុងសង្កាត់ ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរស២នាក់ជិះម៉ូតូមួយគ្រឿងម៉ាក Today ពណ៌ខៀវលាយស ពាក់ស្លាកលេខ ភ្នំពេញ 1FL-3864ធ្វើដំណើរតាមបណ្ដោយផ្លូវសុធារស ក្នុងទិសដៅពីត្បូងទៅជើងស្ថានភាពស្រវឹងស្រឿងៗរ៉េពេញផ្លូវ។លុះមកដល់ចំណុចកើតកន្លែងក្បែរប៉ុស្ដិ៍នគរបាលសង្កាត់ទន្លេបាសាក់នោះស្រាប់តែរថយន្តម៉ាក ឡិចស៊ីស GS300 ពណ៌ខ្មៅ ពាក់ស្លាកលេខ ភ្នំពេញ 2R-2141 របស់កញ្ញា ពេជ្រ អាវីហ្សា ដែលធ្វើដំណើរពីត្បូងទៅជើង(បញ្ច្រាសទិសគ្នា) ក្នុងល្បឿនលឿនធ្វើឲ្យបុកពេញទំហឹងអូសម៉ូតូចំងាយជាង២០ម៉ែត្រ បណ្ដាលឲ្យបុរសទាំងពីរ រងរបួសធ្ងន់ធ្ងរ រីឯម៉ូតូខូចខាតយ៉ាងដំណំ។
ក្រោយកើតហេតុ តារាសម្ដែងស្រីស្អាតមិនបានទៅណាទេ គឺនៅទទួលខុសត្រូវតាមផ្លូវច្បាប់ ពោល គឺកញ្ញា អាវីហ្សា បានចុះពីរថយន្តក្នុងសភាពស្រវឹងស្រឿងៗដូចគ្នា រង់ចាំការដោះស្រាយ។ ប៉ុន្តែដោយភាគីម៉ូតូរងរបួសធ្ងន់នគរបាលប៉ុស្តិ៍ហៅរថយន្តសាមុយដឹកយកទៅសង្គ្រោះភ្លាមៗ ចំណែកម៉ូតូ និងរថយន្ត ត្រូវបាននគរបាលមូលដ្ឋានធ្វើការវាស់វែងយកទៅរក្សាទុក ដើម្បីរងចាំការដោះស្រាយពេលក្រោយ៕សារ៉េត