ភ្នំពេញ៖បុរសម្នាក់សង្ស័យស្រវឹងស្រាតេទូរស័ព្ទនិយាយជាមួយសង្សារដេកលក់មួយភាំងនៅលើចិញ្ចើមផ្លូវរថភ្លើងត្រូវរទេះភ្លើងកិនស្លាប់យ៉ាងអាណោចអាធ័ម។ហេតុការណ៍នេះបានកើតឡើងកាលពីវេលាម៉ោង២:០០នាទីយប់ឈានចូលថ្ងៃទី២៨ខែមិនាឆ្នាំ២០១៧ស្ថិតនៅតាមបណ្ដោយផ្លូវរថភ្លើងក្នុងភូមិអង្គសង្កាត់ចោមចៅខណ្ឌពោធិ៍សែនជ័យ។
សាកសពជនរងគ្រោះត្រូវបានគេស្គាល់ឈ្មោះមឿន ឈុន អាយុ២៨ឆ្នាំមុខរបរកម្មកររោងចក្រនិងបញ្ចូលបទភ្លេងស្នាក់នៅផ្ទះជួលក្នុងភូមិកើតហេតុខាងលើ។មានស្រុកកំណើតនៅភូមិត្រពាំងខ្នារឃុំនិទានស្រុកបសេដ្ឋខេត្តកំពង់ស្ពឺ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញជនរងគ្រោះអង្គុយបញ្ចូលបទភ្លេងដូចសព្វដង។លុះក្រោយមកជនរងគ្រោះទៅផឹកស្រាជាមួយមិត្តភ័ក្ដិរួចក៏តេទូរស័ព្ទនិយាយលេងនឹងសង្សារ។ សង្ស័យដេកលក់មួយភាំងនូវលើចិញ្ចើមផ្លូវរថភ្លើងត្រូវរទេះភ្លើងកិនស្លាប់យ៉ាងអាណោចអាធ័ម។បន្ទាប់មកមានប្រជាពលរដ្ឋដែលរស់នៅក្បែរកន្លែងកើតហេតុដើរមកឃើញទើបរាយការណ៍ប្រាប់កម្លាំងនគរបាលមូលដ្ឋានចុះទៅពិនិត្យ។ប៉ុន្តែដោយសារសាច់ញាតិបងប្អូនជនរងគ្រោះពុំប្ដឹងផ្ដល់អ្វី ហើយសុំយកសាកសពយកទៅធ្វើបុណ្យទើបកម្លាំងនគរបាលមូលដ្ឋានសហការជាមួយនគរបាលខណ្ឌប្រគល់ទៅក្រុមគ្រួសារនៃសព។
បច្ចុប្បន្ននេះសាកសពជនរងគ្រោះត្រូវបានកម្លាំងនគរបាលមូលដ្ឋានសហការជាមួយនគរបាលខណ្ឌប្រគល់ទៅក្រុមគ្រួសារនៃសពយកទៅធ្វើបុណ្យតាមប្រពៃណីនៅឯគេហដ្ឋាន៕សារ៉េត