ខេត្តកណ្ដាល៖ បុរសម្នាក់ជិះម៉ូតូមួយគ្រឿងរួមជាមួយនារីម្នាក់ទៀតធ្វើដំណើរយ៉ាងលឿនដូចហោះប្រញាប់ក្នុងផ្លូវចង្អៀតជ្រុលទៅបុករថយន្តពីក្រោយពេញទំហឹងបណ្តាលឲ្យស្លាប់បាត់បង់ជីវិតម្នាក់នឹងម្នាក់ទៀតរងរបួសធ្ងន់។ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៣:១៥នាទីថ្ងៃត្រង់ថ្ងៃទី៣១ខែមិនាឆ្នាំ២០១៧ស្ថិតនៅតាមបណ្ដោយផ្លូវជាតិលេខ៨ចំណុចភូមិ ព្រៃបាំង ឃុំសុីធរ ស្រុកខ្សាច់កណ្ដាល ខេត្តកណ្ដាល។
អ្នកបើកបរម៉ូតូបង្កហេតុត្រូវបានគេស្គាល់ឈ្មោះនួន សុជាតិ ភេទប្រុស អាយុ២៩ឆ្នាំស្នាក់នៅភូមិបទសន្រ្ទា ឃុំកំពង់ពពិលស្រុកពារាំងខេត្តព្រៃវែង (ស្លាប់)និងអ្នករួមដំណើរម្នាក់ទៀតឈ្មោះ នី ភេទស្រី អាយុ២៨ឆ្នាំនៅខេត្តកំពង់ធំ (រងរបួសធ្ងន់)។ដោយ ម៉ូតូម៉ាក Smash V ពណ៌ខ្មៅ ពាក់ផ្លាកលេខ ភ្នំពេញ 1FB. 4784។ចំណែកឯអ្នកបើកបររថយន្តមិនត្រូវបានគេស្គាល់អត្តសញ្ញាណនោះឡើយដោយបើកបររថយន្តម៉ាកហុីយ៉ាន់ដាយពណ៌សពាក់ស្លាកលេខភ្នំពេញ3D6071។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនរងគ្រោះរួមជាមួយនឹងនារីម្នាក់ជិះម៉ូតូពីក្រោយយ៉ាងលឿនធ្វើដំណើរតាមបណ្ដោយផ្លូវជាតិលេខ៨ក្នុងទិសដៅពីកើតទៅលិចស្ថានភាពផ្លូវចង្អៀតវ៉ាចុះវ៉ាឡើងក៏ជ្រុលទៅបុករថយន្តពីក្រោយធ្វើដំណើរស្របទិសគ្នាពេញទំហឹងបណ្តាលឲ្យស្លាប់បាត់បង់ជីវិតម្នាក់នៅក្នុងថ្លុកឈាមនឹងកន្លែងកើតហេតុ។ចំណែកឯបើកបររថយន្តឃើញសភាពបែបដូច្នោះក៏បើកទ្វាររថយន្តរត់គេចខ្លួនបាត់ស្រមោលបន្សល់ទុកតែរថយន្តនៅនឹងកន្លែងកើតហេតុប៉ុណ្ណោះ។
ក្រោយពីកើតហេតុគេឃើញនគរបាលមូលដ្ឋានចុះទៅកន្លែងកើតហេតុដើម្បីធ្វើចរាចរណ៍និងទំនាក់ទំនងរថយន្តសង្គ្រោះដឹកជនរងគ្រោះទៅព្យាបាលនៅមន្ទីរពេទ្យព្រមទាំងស្វែងរកសាច់ញាតិមកទទួលសាកសពយកទៅធ្វើបុណ្យតាមប្រពៃណីនៅឯគេហដ្ឋាន។ដោយឡែកម៉ូតូជនរងគ្រោះនិងរថយន្តត្រូវបានកម្លាំងនគរបាលមូលដ្ឋានប្រគល់ទៅអោយនគរបាលស្រុក ខ្សាច់កណ្ដាលយកទៅរក្សាទុករងចាំការដោះស្រាយនូវពេលក្រោយ៕សារ៉េត