ខេត្តកណ្ដាល៖ យំសោកបោកខ្លួនស្តាយស្រណោះស្វាមី ខណៈដែលទៅពិធីមង្គលការបងប្អូនពេលត្រឡប់មកផ្ទះវិញចូលបន្ទប់ដេកជាមួយប្រពន្ធកូនដល់ពាក់កណ្ដាលអាធ្រាត្រស្លាប់បាត់បង់ជីវិតស្រស់ៗនៅនិងភ្នែក។ហេតុការណ៍នេះបានកើតឡើងកាលពីវេលាម៉ោង២:០០នាទីយប់ថ្ងៃទី៣ខែមេសាឆ្នាំ២០១៧ស្ថិតនៅភូមិជន្លឹង ឃុំរកាជន្លឹង ស្រុកខ្សាច់កណ្តាល ខេត្តកណ្ដាល ។
ជនរងគ្រោះឈ្មោះ យោន យាង ភេទប្រុស អាយុ ៤០ឆ្នាំ ជនជាតិ ខ្មែរ សាសនា ព្រះពុទ្ធ មុខរបរ កសិករ សព្វថ្ងៃនៅភូមិ.ឃុំកើត ហេតុ(ស្លាប់)។ចំណែកឯប្រពន្ធឈ្មោះ រ៉ន រ៉ាន អាយុ ៣៩ឆ្នាំ ជនជាតិខ្មែរ មុខរបរ កសិករ មានទីលំនៅភូមិឃុំកើតហេតុ ព្រមទាំងមានកូន ០២នាក់ស្រី ០១នាក់ប្រុស ០១នាក់។
តាមប្រភពពត៌មានពីប្រពន្ធរបស់ជនរងគ្រោះបានអោយដឹងថា នៅមុនពេលកើតហេតុថ្ងៃទី០២.០៤.២០១៧ វេលាម៉ោង១៨.០០នាទីល្ងាចជនរងគ្រោះបានទៅចូលរួមមង្គលការនៅភូមិតាំងឫស្សី ឃុំរកាជន្លឹងដល់វេលាម៉ោង២១.០០នាទីយប់ជនរងគ្រោះក៏ត្រឡប់មកដល់ផ្ទះវិញហើយក៏ចូលដេកជាមួយប្រពន្ធកូនដូចធម្មតា។រហូតដល់វេលាម៉ោង ២.០០នាទីយប់ឈានចូលថ្ងៃទី០៣.០៤.២០១៧ ខ្លួនបានភ្ញាក់ពីដេកហើយហៅជនរងគ្រោះឱ្យងើបតែជនរងគ្រោះមិនភ្ញាក់។បន្ទាប់មកប្រពន្ធក៏ស្រែកឆោឡោហៅបងប្អូនមកជួយ តែជនរងគ្រោះបានដាច់ខ្យល់ស្លាប់ទៅហើយ ។
ក្រោយពីកើតហេតុកម្លាំងនគរបាលមូលដ្ឋានចុះទៅកន្លែងកើតហេតុដើម្បីធ្វើកោសល្យវិច័យពិនិត្យដោយហ្មត់ចត់ និងមានការចូលរួមពីគ្រូពេទ្យ មេភូមិ ក្រុមប្រឹក្សាឃុំសាកសពពុំមានស្លាកស្នាមអ្វីគួរឲ្យកត់សំគាល់ឡើយគឺពិតជាស្លាប់ដោយសារខ្យល់គ។
បច្ចុប្បន្ននេះសាកសពជនរងគ្រោះត្រូវបានកម្លាំងនគរបាលមូលដ្ឋានប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណីនៅឯគេហដ្ឋាន៕សារ៉េត