ភ្នំពេញ៖ បុរសម្នាក់ជិះម៉ូតូបញ្ច្រាសចរាចរណ៍ត្រូវម៉ូតូមួយគ្រឿងទៀតបុកបណ្ដាលអោយរងរបួសធ្ងន់។ហេតុការណ៍នេះបង្កអោយមានការភ្ញាក់ផ្អើលកាលវេលាម៉ោង ៨នឹង៣០នាទីយប់ថ្ងៃទី ១៩ខែ ឧសភា ឆ្នាំ២០១៧ តាមបណ្តោយផ្លូវវេងស្រេង ភូមិត្រពាំងថ្លឹងសង្កាត់ចោមចៅខណ្ឌពោធិ៍សែនជ័យ។
អ្នកបើកបរម៉ូតូបង្កហេតុត្រូវបានគេស្គាល់ឈ្មោះ ឆាត ភឿនភេទប្រុស អាយុ៣១ ឆ្នាំ មុខរបរសំណង់ស្នាក់ភូមិព្រៃទាសង្កាត់ចោមចៅ មានភូមិកំណើតភូមិក្តីរុន ឃុំខ្វាវស្រុកត្រាំង ខេត្តតាកែវ ដោយជិះម៉ាក ហុងដា ពណ៌ ខ្មៅពាក់ស្លាកលេខតាកែវ .1H1520(រងរបួសធ្ងន់)។ចំណែកឯជនរងគ្រោះមិនត្រូវបានគេស្គាល់ឈ្មោះនោះទេ ដោយជិះម៉ូតូម៉ាកហុងដាពណ៌ខ្មៅពាក់ស្លាក់លេខភ្នំពេញ1CK.3877( រងរបួសស្រាល)។
តាមប្រភពពត៌មានពីកន្លែងកើតហេតុអោយដឹងថា នៅមុនពេលកើតហេតុគេឃើញម៉ូតូបង្ក ម៉ាកហុងដាពាក់ស្លាកតាកែវធ្វើដំណើរតាមបណ្ដោយផ្លូវវេងស្រេងក្នុងទិសដៅពីកើតទៅលិច បើកអែបទ្រូងផ្លូវកណ្តាល ដោយបើកសេញ៉ូស្តាំ។បន្ទាប់មកស្រាប់តែម៉ូតូរងគ្រោះម៉ាកហុងដាពាក់ស្លាកលេខភ្នំពេញបើកបរក្នុងទិសដៅពីលិចទៅកើត។លុះមកដល់ចំណុចកើតហេតុ ដោយមិនដឹងមានម៉ូតូបើកបញ្ជាស់ហើយបានបុកម៉ូតូបង្កខាងលើ ពេញទំហឹង បណ្តាលអោយម៉ូតូបង្កខាងលើខូចខាតតិចតួច អ្នកបើកបររងរបួសធ្ងន់។ចំណែកម៉ូតូរងគ្រោះដែលបុកគេ ខូចម៉ូតូយ៉ាងខ្លាំងអ្នកបើកបររងរបួសស្រាល ។
ក្រោយពេលកើតហេតុ អ្នករងរបួសធ្ងន់ត្រូវបានរថយន្តសង្គ្រោះរបស់ សម្ភពរស្មី បានដឹកជនរងគ្រោះយកទៅព្យាបាលភ្លាមផងដែរ។ដោយឡែកអ្នករងរបួសស្រាល មិនបានឡើងរថយន្តសង្គ្រោះទេ សុខចិត្តទៅព្យាបាលរបួសនៅគ្លីនិកឯកជនដោយខ្លួនឯង។ចំណែកឯម៉ូតូទាំង២គ្រឿងខាងលើត្រូវបានជំនាញ ចរាចរណ៍ខណ្ឌពោធិ៍សែនជ័យយកទៅ រក្សាទុករងចាំការដោះស្រាយនូវពេលក្រោយ៕ វាសនា