ភ្នំពេញ៖បុរសម្នាក់ជាកម្មករសំណងនៅខនដូ SKY LAខូចចិត្តនឹងជនជាតិចិនស្តីបន្ទោសលោតពីលើអាគារជាន់ទី២០មកទើរជាន់ទី៦បណ្ដាលឲ្យរងរបួសធ្ងន់ត្រូវកម្មករដូចគ្នាដឹកយកទៅព្យាបាលទាំងយប់នៅមន្ទីរពេទ្យរុស្ស៊ី។ហេតុការណ៍នេះបានកើតឡើងកាលពីវេលាម៉ោង២០:០០នាទីយប់ថ្ងៃទី៩ខែមិថុនាឆ្នាំ២០១៧ស្ថិតនៅការដ្ឋានកំពុងសាងសង់ខនដូ SKY LA ទីតាំងលេខ ១២ ផ្លូវលេខ ៤១ ក្រុមទី ៦១ភូមិទី១០ សង្កាត់ ទន្លេបាសាក់ ខណ្ឌ ចំការមន។
ជនរងគ្រោះត្រូវបានគេស្គាល់ឈ្មោះ ប៊ុល បុញ ភេទ ប្រុសអាយុ ២២ ឆ្នាំ មុខរបរ កម្មករសំណង់មានស្រុកកំណើតនៅភូមិត្រាវភានី ឃុំ តាំងក្រសាំង ស្រុក បាធាយខេត្តកំពង់ចាម។បច្ចុប្បន្នស្នាក់នៅការដ្ឋានកើតហេតុខាងលើ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅព្រឹកថ្ងៃទី ០៩ខែមិថុនាឆ្នាំ២០១៧ជនរងគ្រោះត្រូវបានមេការសំណង់ជនជាតិចិនចាត់អោយរៀបចំសំណាញ់សំរាប់បូកជញ្ជាំងនៅជាន់ទី២០ជាមួយកម្មករផ្សេងទៀត។ប៉ុន្តែជនរងគ្រោះពុំបាន
ពាក់ស្បែកជើងនិងមួកសុវត្ថិភាពទេត្រូវមេការចិនដេញអោយចុះមកក្រោមវិញ។លុះដល់ម៉ោង១៣.០០នាទីថ្ងៃត្រង់ជនរងគ្រោះក៏ឡើងទៅធ្វើការជាធម្មតាវិញតែមានទឹកមុខស្រពោនដូចជាមានទុកអ្វីមួយអញ្ចឹង។រហូតដល់ម៉ោង១៧:០០នាទីល្ងាចចប់ពីការងារជនរងគ្រោះក៏ចុះមកក្រោមមិនដឹងដើរទៅណាបាត់។បន្ទាប់មកម៉ោង ២០:០០នាទីយប់ថ្ងៃដដែលស្រាប់តែឮសូរដូចជាដុំថ្មអ្វីធ្លាប់ពីលើអាគារ តែពុំមាននរណាចាប់អារម្មណ៍នោះ។មួយសន្ទុះក្រោយមកមានសំលេងទូរសព្ទ័រោលនៅលើសំណាញ់ដែកហ៊ុំពទ្ឋ័អាគារនៅជាន់ទី៦ក៏នាំគ្នាទៅមើលឃើញជនរងគ្រោះដេកសន្លប់នៅលើសំណាញ់នាំគ្នាលើដឹកយកមកសង្គ្រោះនៅមន្ទីរពេទ្យមិត្តភាពខ្មែរសូវៀតតែម្តង។
ក្រោយពីកើតហេតុគេឃើញកម្លាំងនគរបាលប៉ុស្ដិ៍មូលដ្ឋានសហការជាមួយនគរបាលជំនាញនៃស្នងការរាជធានីភ្នំពេញចុះទៅធ្វើកោសល្យវិច័យដើម្បីត្រួតពិនិត្យទីតាំងខាងលើថែមទាំងចរចារជាមួយម្ចាស់ទីតាំងហាក់បីដូចជាបិទបាំងរឿងម្យ៉ាងអញ្ចឹង។
បច្ចុប្បន្ននេះជនរងគ្រោះកំពុងសំរាកព្យាបាលនៅមន្ទីរពេទ្យខ្មែរសូវៀត ហៅមន្ទីរពេទ្យរុស្ស៊ី៕សារ៉េត