ភ្នំពេញ៖បុរសម្នាក់ចេញពីផឹកស៊ីស្រវឹងស្រាជិះម៉ូតូលឿនមិនប្រុងប្រយ័ត្នជ្រុលទៅបុកម៉ូតូមួយគ្រឿងទៀតបណ្តាលឲ្យរងរបួសធ្ងន់ធ្ងរត្រូវរថយន្តសង្គ្រោះដឹកយកទៅព្យាបាលទាំងយប់។ហេតុការណ៍នេះបានកើតឡើងកាលពីវេលាម៉ោង១១:១៥នាទីយប់ថ្ងៃទី១១ខែមិថុនាឆ្នាំ២០១៧ស្ថិតនៅតាមបណ្ដោយផ្លូវ២៥៧កែង១៨២សង្កាត់ទឹកល្អក់៣ខណ្ឌទួលគោក។
អ្នកបើកបរម៉ូតូបង្កហេតុត្រូវបានគេស្គាល់ឈ្មោះ ថាធឿន អាយុប្រហែលជាង៣០ឆ្នាំមុខរបរសន្តិសុខយាមក្រុមហ៊ុននៅសង្កាត់ទឹកល្អក់ទី២ខណ្ឌទួលគោក។ចំណែកឯជនរងគ្រោះមិនត្រូវបានគេស្គាល់ឈ្មោះនោះទេ។
តាមប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេឃើញជនបង្កហេតុជិះម៉ូតូមួយគ្រឿងម៉ាកHoda dreamសេរី ២០១២ពណ៌ខ្មៅពាក់ផ្លាកលេខភ្នំពេញ1BQ-7975ធ្វើដំណើរតាមបណ្ដោយផ្លូវ១៨២ក្នុងទិសដៅពីលិចទៅកើតក្នុងសណ្ឋានភាពស្រវឹងក៏បានបុកម៉ូតូជាមួយគ្រឿងទៀតម៉ាកPCXពណ៌សរពាក់ផ្លាកលេខភ្នំពេញ1FX-9298ធ្វើដំណើរតាមបណ្ដោយផ្លូវ២៥៧ក្នុងទិសដៅពីត្បូងទៅជើងក៏ត្រូវបានជនបង្កបុកពេញទំហឹងបណ្ដាលអោយរងរបួសធ្ងន់ដោយបាក់ស្លាបក្រចៀវជនរងគ្រោះ។
ក្រោយពីកើតហេតុគេឃើញកម្លាំងនគរបាលប៉ុស្ដិ៍មូលដ្ឋានចុះទៅកន្លែងកើតហេតុដើម្បីធ្វើចរាចរណ៍និងទំនាក់ទំនងហៅរថយន្តសង្គ្រោះដឹកជនរងគ្រោះទៅព្យាបាលនៅមន្ទីរពេទ្យឯកជន។ចំណែកឯម៉ូតូជនរងគ្រោះនិងម៉ូតូបង្កហេតុត្រូវបានកម្លាំងនគរបាលខណ្ឌទួលគោកយកទៅរក្សាទុករងចាំការដោះស្រាយតាមផ្លូវច្បាប់៕សារ៉េត