ភ្នំពេញៈ កាលពីវេលាម៉ោង១១និង២០នាទីយប់ថ្ងៃទី១៩ ខែមិថុនា ឆ្នាំ២០១៧ នៅលើស្ពានអាកាសស្ទឹងមានជ័យខាងជើង ស្ថិតក្នុងសង្កាត់មានជ័យ ខណ្ឌមានជ័យមានឧប្បត្តិហេតុគ្រោះថ្នាក់ចរាចរណ៍មួយកើតឡើង ដោយសារបុរសម្នាក់សង្ស័យស្រវឹងស្រាជិះម៉ូតូចុះពីលើស្ពានអាកាសស្ទឹងមានជ័យមិនប្រយត្ន័ក៏បានជ្រុលទៅបុកយរថយន្តហាយឡែនឌ័រ ក្នុងទិសដៅបញ្ច្រាសគ្នាចំពីមុខពេញទំហឹង បណ្ដាលឲ្យខ្លួន បាក់ជើងឆ្វេងរងរបួសធ្ងន់ ។
សាក្សីបានឲ្យដឹងថា មុនពេលកើតហេតុ គេឃើញម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅមួយគ្រឿងពាក់ស្លាកលេខ កំពង់ស្ពឺ 1C-1350 ជិះដោយបុរសមិនស្គាល់ឈ្មោះម្នាក់ធ្វើដំណើរខាងលើស្ពានអាកាសស្ទឹងមានជ័យក្នុងទិសដៅពីត្បូងទៅជើង។លុះពេលចុះពីលើស្ពានយ៉ាងលឿន នោះក៏ជ្រុលចង្កូតទៅបុករថយន្តម៉ាក HIGE LANDER ពណ៌ស្ករ ពាក់ស្លាកលេខ ភ្នំពេញ 2AK-1023 ដែលធ្វើដំណើរឡើងមកលើស្ពាន ក្នុងទិសដៅបញ្ច្រាសគ្នាចំពីមុខពេញទំហឹង បណ្ដាលឲ្យអ្នកជិះម៉ូតូរងរបួសធ្ងន់ បាក់ជើងឆ្វេង ត្រូវបានរថយន្តសាមុយបញ្ចូនទៅមន្ទីរពេទ្យភ្លាមៗ។ ចំណែកម៉ូតូនិងរថយន្តរងការខូចខាត មួយកំណាត់មុខស្ទើរដូចគ្នា ។
ក្រោយពេលកើតហេតុ ម៉ូតូនិងរថយន្ត ត្រូវបានសមត្ថកិច្ចការិយាល័យនគរបាលចរាចរផ្លូវគោករាជធានី វាស់វែងយកមធ្យោបាយដឹកជញ្ជូនទាំងពីរគ្រឿងទៅរក្សារទុកនៅអធិការដ្ឋាននគរបាលខណ្ឌមានជ័យ រង់ចាំភាគីទាំងសងខាងចូលខ្លួនមកដោះស្រាយតាមផ្លូវច្បាប់៕អូនធួក
