ជនសង្ស័យ២នាក់ឆក់ទូរស័ព្ទពីសិស្សស្រីកំពុងជិះស៊ីក្លូ សមត្ថកិច្ចឃាត់ខ្លួនបាន

0
190

ភ្នំពេញៈ ជនសង្ស័យ២នាក់ បានជិះម៉ូតូ​ធ្វើសកម្មភាពឆក់ទូរសព្ទ​ពីសិស្សស្រី​ពីរនាក់បានសម្រេច ខណៈកំពុងជិះស៊ីក្លូកាលពីម៉ោង៥និង៣០នាទីល្ងាចថ្ងៃទី២១ ខែមិថុនា ឆ្នាំ២០១៧ ចំណុចផ្លូវ១៣កែង៩៤ សង្កាត់វត្តភ្នំ ខណ្ឌដូនពេញ ហើយបានព្យាយាមគេចខ្លួន តែគេចមិនរួច ត្រូវសមត្ថកិច្ចក្របួចជាប់ ។

នារីរងគ្រោះបានឲ្យដឹងថា មុនពេលកើតហេតុ គាត់​កំពុងជិះស៊ី​ក្លូពីរ​នាក់មិត្តភក្តិ តាមបណ្តោយផ្លូវព្រះនរោត្តម ពីត្បូងមកជើង ដល់ចំណុចផ្លូវ១៣០កែងផ្លូវនរោត្តម ស្រាប់តែមានជនសង្ស័យ៤នាក់ ជិះ​ម៉ូតូ២គ្រឿង មួយគ្រឿងម៉ាក SUZUKI LET’S ពណ៌ស មិនចាំស្លាកលេខជិះគ្នា២នាក់និងមួយគ្រឿងទៀតម៉ាក HONDA C125 ពណ៌ខ្មៅ ស្លាកលេខភ្នំពេញ 1FQ-5557 ជិះគ្នា២នាក់  ហើយបានជិះមកក្បែរគាត់ (នារីរងគ្រោះ) ពេលនោះ​ជនសង្ស័យ ដែលជិះម៉ូតូ HONDA C125 បានឆក់យកទូរសព្ទដៃរបស់គាត់ ម៉ាក IPHON6S បានសម្រេច ហើយព្យាយាម​បើកម៉ូតូគេចខ្លួនយ៉ាងលឿន ដោយបក្ខពួកដែលជិះម៉ូតូម៉ាក SUZUKI LET’S ជាអ្នកជិះបិទគូថពីក្រោយ។

នារីរងគ្រោះបន្តថា ក្រោយពីជនសង្ស័យបានឆក់ទូរសព្ទបានហើយ នាងបានស្រែកថា ចោរៗ ស្របពេលក៏មានកម្លាំងសមត្ថកិច្ចកំពុងតែល្បាតនៅក្បែរនោះ ក៏បានចេញអន្តរាគមន៍ដេញប្រផាប់ចាប់ប្រផីងរហូតដល់ចំណុចខាងលើ ក៏បានបុកម៉ូតូជនសង្ស័យ បណ្តាលឲ្យ​ដួល ទើបឃាត់បានជនសង្ស័យទាំង២នាក់ រីឯបក្ខពួក២នាក់ទៀត ដែលជិះម៉ូតូម៉ាកSUZUKI LET’S គេចខ្លួនបាត់។

សមត្ថកិច្ចបានឲ្យដឹងថា ជនសង្ស័យទី១.ឈ្មោះ ជួន វិរៈសត្យា ភេទប្រុស អាយុ១៥ឆ្នាំ សិស្ស ស្នាក់នៅផ្ទះលេខ២B ផ្លូវ៥១ សង្កាត់ផ្សារថ្មី៣ ខណ្ឌដូនពេញ(ជាអ្នកបើកម៉ូតូ)។ ២.ឈ្មោះ មាស ភីម ភេទប្រុស អាយុ១៥ឆ្នាំ សិស្ស ស្នាក់នៅផ្ទះ(មិនចាំលេខ) ផ្លូវ៦៧ ក្រុម៤ សង្កាត់ផ្សារថ្មី២ ខណ្ឌដូនពេញ (ជាអ្នកឆក់)។​ នារីរងគ្រោះឈ្មោះ ជឹម ស្រីនិច ភេទស្រី អាយុ២២ឆ្នាំ សិស្ស ស្នាក់នៅផ្ទះលេខ៥០E៣ ផ្លូវ១០៧ សង្កាត់មនោរម្យ ខណ្ឌ៧មករា ៕ អូន ធួក

LEAVE A REPLY

Please enter your comment!
Please enter your name here