ភ្នំពេញ៖ ស្ត្រីវ័យចំណាស់ជាស្មូមម្នាក់ ឈ្មោះ ភួង ចន្នី អាយុ៥០ឆ្នាំ ត្រូវបានមន្ត្រីកងរាជអាវុធហត្ថរាជធានីភ្នំពេញ បញ្ជូនខ្លួនទៅតុលាការ កាលពីរសៀល ថ្ងៃទី៣ កក្កដា ពាក់ព័ន្ធកៀបបង្ខំកុមារតូចៗឲ្យសុំទានតាមទីសាធារណៈ ដើម្បីចាត់ការតាមនីតិវិធី។
ស្ត្រីរូបនេះ ត្រូវបានតំណាងអយ្យការអមសាលាដំបូងរាជធានីភ្នំពេញ ចោទប្រកាន់ពីបទកេងប្រវ័ញ្ចពលកម្មលើកុមារ និងរក្សាទុកកុមារដោយខុសច្បាប់។
លោកវរសេនីយ៍ត្រី សេន កូម៉ុន នាយការិយាល័យប្រឆាំងបទល្មើសជួយដូរមនុស្ស កងរាជអាវុធហត្ថរាជធានីភ្នំពេញ បានថ្លែងនៅព្រឹក ថ្ងៃទី៤ កក្កដាឆ្នាំ២០១៧ ថា នេះជាលើកទី១ហើយ ដែលកម្លាំងកងរាជអាវុធហត្ថរាជធានីបានបង្ក្រាបនិងមានចំណាត់កាទៅលើករណីសុំទានតាមចិញ្ចើមផ្លូវ ប្រយោជន៍ដើម្បីរក្សាសណ្ដាប់ធ្នាប់ និងសង្គ្រោះកុមាររងគ្រោះដែលមនុស្សចាស់ពេញវ័យកេងប្រវ័ញ្ចពលកម្មកុមារ។
នៅចំពោះមុខសមត្ថកិច្ចស្រី្តរូបនេះបានសារភាពថា គេបានប្រកបមុខរបរនេះអស់រយៈពេល៧-៨ឆ្នាំមកហើយ ដោយក្មេងៗទាំងនោះ ត្រូវបានគាត់យកចេញពីគ្រួសារក្រខ្សត់មកបង្ហាត់បង្រៀនឲ្យសុំទានហើយក្មេងៗរងគ្រោះទាំងនោះត្រូវបានគេវាយធ្វើបាប បើសិនជាសុំលុយមិនបានតាមចំនួនកំណត់របស់គេទេនោះ ។
គួរបញ្ជាក់ថា ស្ត្រីឈ្មោះ ភួង ចន្នី ត្រូវបានកម្លាំងកងរាជអាវុធហត្ថរាជធានីភ្នំពេញ ឃាត់ខ្លួនកាលពីថ្ងៃទី៣០ ខែមិថុនា ឆ្នាំ២០១៧ ជាមួយក្មេងៗសរុប ៧នាក់ ដែលក្នុងនោះមានទារក២នាក់ បន្ទាប់ពីស្រី្តរូបនេះ បង្ខំកុមារទាំងនេះឲ្យដើរសុំទានតាមផ្លូវសាធារណៈក្នុងរាជធានីភ្នំពេញយកលុយឲ្យខ្លួន។ ក្មេងៗរងគ្រោះទាំងនោះ ត្រូវបានសមត្ថកិច្ចបញ្ជូនឲ្យទៅស្នាក់នៅជាមួយអង្គការគាំពារកុមារ ដើម្បីស្វែងរកម្ដាយ និងអាណាព្យាបាលរបស់ពួកគេផងដែរ៕ អូន ធួក