ភ្នំពេញ ៖ បុរសជនជាតិអូស្ត្រាលីម្នាក់ បានដេកស្លាប់នៅក្នុងបន្ទប់សណ្ឋាគារមួយកន្លែងដោយគាំងបេះដូង ស្ថិតក្នុងសង្កាត់បឹងកេងកង២ ខណ្ឌចំការមន បង្កការភ្ញាក់ផ្អើលកាលពីវេលាម៉ោង១០ព្រឹកថ្ងៃទី៦ កក្កដា ២០១៧។
ជនរងគ្រោះឈ្មោះវ៉ាយហ្វៀល ម៉ាកជេម អាយុ៣៣ឆ្នាំ ជនជាតិអូស្ត្រាលី និងជាអ្នកទេសចរណ៍ ។ មុនពេលកើតហេតុ ជនរងគ្រោះនិងមិត្តភក្តិម្នាក់ឈ្មោះហ្វាឡាំងហ្គា អាន់ថូនី ប្រេន អាយុ២៧ឆ្នាំ ជនជាតិអូស្ត្រាលី បានចេញទៅហូបបាយជាមួយគ្នានៅហាងអ៊ីតាលី និងផឹកស្រាបៀរអស់១២កំប៉ុង ។ លុះនៅវេលាម៉ោង១០យប់ថ្ងៃដដែល ក៏នាំគ្នាមកសណ្ឋាគារវិញសម្រាករៀងខ្លួន។
ប្រភពបន្តថា ស្រាប់តែនៅវេលាម៉ោង១០ព្រឹកថ្ងៃទី០៥ កក្កដា នេះ មានបុគ្គលិកសណ្ឋាគារ ជាអ្នកសំអាតទៅគោះទ្វារមិនបើក ហើយទូរស័ព្ទចូលក៏មិនលើក និងនៅមុខបន្ទប់បានដាក់ស្លាកហាមរំខាន ពេលនោះបុគ្គលិកក៏នាំគ្នាយកសោមកចាក់ឃើញស្លាប់នៅលើគ្រែដែលគេសង្ស័យថាស្លាប់ដោយគាំងបេះដូង៕ អូន ធួក
