ភ្នំពេញ៖ ក្រុមអ្នកញៀនលេងល្បែងស៊ីសងបាញ់អាប៉ោងប្រុសស្រី ចំនួន២នាក់ត្រូវបាននគរបាល ប៉ុស្តិ៍ទឹកថ្លាចាប់ខ្លួនជាក់ស្តែង ខណៈដែលពួកគេកំពុងជួបជុំគ្នាបាញ់អាប៉ោងភ្នាល់ដាក់លុយខុសច្បាប់។ហេតុការណ៍នេះបានកើតឡើងកាលពីវេលាម៉ោង៨យប់ថ្ងៃទី១៨ខែកក្កដា ឆ្នាំ២០១៧នៅចំណុចមុខបន្ទប់ផ្ទះជួលមួយកន្លែងស្ថិតក្នុងភូមិស្លែងរលើងសង្កាត់ទឹកថ្លាខណ្ឌសែនសុខ។
ទីតាំងលេងល្បែងស៊ីសងខាងលើត្រូវបានកម្លាំងនគរបាលខណ្ឌធ្លាប់បង្ក្រាបច្រើនដងមកហើយប៉ុន្តែពួកគេមិនរាងចាលសោះ ដែលបញ្ហានេះត្រូវបានមហាជនរិះគន់ថា តុលាការនិងនគរបាលចាប់ទៅដោះលែងយកតែលុយ ទើបធ្វើអោយអ្នកញៀនល្បែងទាំងនោះមិនសូវខ្លាចច្បាប់ ។
ទោះបីរាជរដ្ឋាភិបាលបានប្រកាសហាមឃាត់ទូទាំងប្រទេស មិនអោយលេងល្បែងស៊ីសងគ្រប់ប្រភេទ មានដូចជា ប៊ៀរ អាប៉ោង កន្ទុយលេខ បាល់ ជល់មាន់ ជាដើម….ល….ដែលគេចាត់ទុកថា វាជាអំពើខុសច្បាប់អ្នកលេងត្រូវមានទោស ដោយពន្យល់ពីហេតុផលថា អ្នកដែលចាញ់ល្បែងស៊ីសង ភាគច្រើនបានក្លាយខ្លួនទៅជាជនល្មើស ធ្វើជាចោរលួច ឆក់ ប្លន់ និងឆបោកទ្រព្យសម្បត្តិគេ ឬប្រើអំពើហឹង្សាគ្រួសារជាដើម។
ជនដែលត្រូវបានឃាត់ខ្លួនក្នុងករណីនេះ ១/ឈ្មោះ ម៉ែន តូច ហៅស្វិត ភេទប្រុសអាយុ៣៥ឆ្នាំ មុខរបកម្មករសំណង់ ស្នាក់នៅផ្ទះជួលបន្ទប់លេខ៨ ភូមិស្លែងរលើងសង្កាត់ទឹកថ្លា ខណ្ឌសែនសុខនិង ២/ ឈ្មោះ ម៉ៅ ដា ភេទស្រី អាយុ៤៨ឆ្នាំ គ្មានមុខរបរ ស្នាក់នៅផ្ទះជួលបន្ទប់លេខ៧ ត្រង់ចំណុចផ្ទះកើតហេតុចាប់ខ្លួន។
តាមប្រភពព៌ត៌មានពីកម្លាំងនគរបាលខណ្ឌសែនសុខម្នាក់សុំមិនបញ្ចេញឈ្មោះបានអោយដឹងថា នៅវេលាម៉ោងប្រហែលម៉ោង៨យប់ថ្ងៃទី១៨ ខែកក្កដានេះ កម្លាំងនគរបាលបានជិះម៉ូតូយាមល្បាតក្នុងមូលដ្ឋានបានប្រទះឃើញហ្វូងមនុស្សមួយក្រុមកំពុងអង្គុយជុំគ្នា ពេលទៅត្រួតពិនិត្យប្រទះឃើញពួកគេកំពុងតែអង្គុយបាញ់អាប៉ោង ភ្នាល់ដាក់លុយ ទើបឃាត់ខ្លួនបាន២នាក់ ឯមួយចំនួនទៀតបានរត់គេចខ្លួនអស់។បន្ទាប់មកកម្លាំងនគរបាលបានដកហូតយកមេអាប៉ោងមួយឈុត និងលុយជាង១០ម៉ឺនរៀល ជាវត្ថុតាងប្រព្រឹត្តបទល្មើស នាំយកមកឃុំខ្លួនសាកសួរនៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕វាសនាសែនជ័យ