ភ្នំពេញ៖ មានហេតុការណ៍ភ្ញាក់ផ្អើលមួយបានកើតឡើង ខណៈម្ចាស់ផ្ទះល្វែង២នាក់ប្ដីប្រពន្ធ រាយការណ៍ប្រាប់នគរបាលខណ្ឌពោធិ៍សែនជ័យថា មានមនុស្សប្រុសម្នាក់បានទៅចុចកណ្ដឹងផងនិងគោះទ្វារផ្ទះរបស់គាត់ផង ក្នុងខណៈដែលពួកគាត់មិននៅ ជាប់រវល់ទៅលក់នំបុ័ងដាក់សាច់នៅតាមមុខរោងចក្រកាត់ដេរ ហើយបានទុកកូនតូចចំនួន៣នាក់នៅចាំផ្ទះ។បន្ទាប់ពីទទួលបានដំណឹងដ៏រសើប ស្របពេលមានពាក្យចចាមអារ៉ាម ថាមានមនុស្សចាប់ក្មេងវះយកក្រលៀនផងនោះ កម្លាំងនគរបាលខណ្ឌពោធិ៍សែនជ័យ រួមជាមួយកម្លាំងនគរបាលប៉ុស្ដិ៍ចោមចៅ បានចុះទៅកាន់ទីនោះភ្លាមៗ ប៉ុន្តែជនសង្ស័យបានគេចបាត់ទៅហើយ ដោយមិនទាន់ដឹងថា គេទៅគោះទ្វារផ្ទះនិងចុចកណ្ដឹងមានបំណងអ្វីនៅឡើយទេ។ហេតុការណ៍នោះបានកើតឡើងកាលពីវេលាម៉ោង៣និង១៥នាទីរសៀលថ្ងៃទី៣១ ខែកក្កដា ឆ្នាំ២០១៧ នៅចំណុចផ្ទះលេខ២៤ បុរីជីបម៉ុងស្ថិតនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព៌ត៌មានពីកម្លាំងនគរបាលបានឲ្យដឹងថា ម្ចាស់ផ្ទះល្វែងមួយនោះត្រូវបានគេស្គាល់ ប្ដីឈ្មោះ គឹម សុប៊ែល អាយុ៣៣ឆ្នាំ និងប្រពន្ធឈ្មោះ គឹម សុភ័ណ្ឌ អាយុ៣២ឆ្នាំមានមុខរបរលក់នំបុ័ងដាក់សាច់ ។ចំណែកកូនរបស់គាត់ទាំងបីនាក់បងប្អូននោះ ១,ឈ្មោះ គឹម សុភក្រ័ ភេទប្រុសអាយុ១២ឆ្នាំ ២,ឈ្មោះគឹម សុខា ភេទស្រីអាយុ៩ឆ្នាំ និង៣,ឈ្មោះ គឹម សុផល ភេទប្រុសអាយុ៣ឆ្នាំ។
តាមប្រភពដដែលបានបន្តទៀតថា នៅមុនពេលកើតហេតុពួកគាត់ បាននាំគ្នាទៅលក់នំបុ័ងដាក់សាច់នៅតាមមុខរោងចក្រ ដោយបានទុកឲ្យកូនប្រុសស្រីរបស់គាត់នៅចាំផ្ទះ ហើយពួកគេបានស្ថិតនៅតែក្នុងផ្ទះប៉ុណ្ណោះ ដោយបានបិទ្វារខ្ទាស់គន្លឹះពីខាងក្នុង។លុះដល់ពេលកើតហេតុ ស្រាប់តែមានបុរសអត្តសញ្ញាណម្នាក់បានទៅចុចកណ្ដឹងព្រមទាំងគោះទ្វារជាច្រើនដង ដែលជាហេតុបង្កឲ្យកូនៗរបស់គាត់មានការភិតភ័យយ៉ាងខ្លាំង ហើយពួកគេមិនបើកទ្វារនោះឡើយ។ពួកគេបាននាំគ្នាសម្ងំនៅក្នុងផ្ទះមិនហ៊ានឆ្លើយនោះទេ ក្រោយមកបានខលប្រាប់ពួកគាត់ទើបពួកគាត់ត្រឡប់ទៅផ្ទះវិញ និងបានសង្ស័យថាជននោះប៉ងចាប់កូនគាត់ ទើបរាយការណ៍ជូននគរបាលឲ្យជួយអន្តរាគមន៍ភ្លាមៗប៉ុន្តែកម្លាំងនគរបាលក៏មិនទាន់បានសន្និដ្ឋានថា ជាករណីប៉ុនប៉ងលួចទ្រព្យសម្បត្តិឬបែបណាពិតប្រាកដនៅឡើយទេ ដោយគ្រាន់តែទទួលពាក្យបណ្ដឹង ទៅតាមអ្វីដែលបានកើតឡើងប៉ុណ្ណោះ៕វាសនាសែនជ័យ