ភ្នំពញ៖បុរសម្នាក់ជាកម្មករសិប្បកម្មផលិតស្បែកជ្រូកបំពងដេកស្លាប់ ខណៈដែលមិត្តភ័ក្តរបស់ជនរងគ្រោះដាស់អោយក្រោបពីដំណេក។ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង០៦:០០នាទីព្រឹកថ្ងៃទី០៩ខែសីហាឆ្នាំ២០១៧ស្ថិតនៅក្នុងសិប្បកម្មផលិតស្បែកជ្រូកបំពងទីតាំងលេខ១៣៩៦ ផ្លូវបេតុងក្រុមទី៥ភូមិត្នោតជ្រុំទី៤សង្កាត់បឹងទំពន់ខណ្ឌមានជ័យ។
សាកសពជនរងគ្រោះត្រូវបានគេស្គាល់ឈ្មោះ ឌឹមភួង ភេទ ប្រុស អាយុ ៣៨ឆ្នាំ មុខរបរ កម្មករសិប្បកម្មបំពងស្បែកជ្រូក ទីលំនៅភូមិ ស្រែតាសុខ ឃុំ ជំរះពេន ស្រុក សំរោងខេត្ត តាកែវ ស្នាក់នៅសិប្បកម្មកើតហេតុខាងលើ។
តាមប្រភពពត៌មានពីមិត្តភ័ក្តរបស់ជនរងគ្រោះឈ្មោះ ម៉ែន ម៉េង ភេទប្រុសបានអោយដឹងថា កាលពីល្ងាចថ្ងៃទី៨ខែសីហាខ្លួននឹងជនរងគ្រោះព្រមទាំងកម្មករផ្សេងទៀតនាំគ្នាហូបបាយ។បន្ទាប់មកក៏នាំគ្នាអង្គុយលេងបៀរ រហូតដល់ម៉ោង ២៣:០០នាទីយប់ទើបបែកគ្នាចូលដេករៀងៗខ្លួន។លុះដល់ម៉ោងដឹងកើតហេតុខាងលើខ្លួនបានទៅដាស់បើកមុងមើលទើបដឹងថាជនរងគ្រោះស្លាប់បាត់បង់ជីវិតទៅហើយ។ក្រោយមកខ្លួនបានរាយការណ៍ទៅម្ចាស់សិប្បកម្មនឹងកម្លាំងនគរបាលប៉ុស្តិ៍បឹងទំពន់ដែលនៅជិតកន្លែងកើតហេតុដើម្បីត្រួតពិនិត្យសាកសពជនរងគ្រោះ។
តាមប្រភពពត៌មានពីកម្លាំងនគរបាលជំនាញនៃស្នងការរាជធានីភ្នំពេញបានអោយដឹងទៀតថា សាកសពជនរងគ្រោះពិតជាស្លាប់ដោយសារគាំងបេះដូងស្លាប់ពិតប្រាកដមែន។
បច្ចុប្បន្ននេះសាកសពជនរងគ្រោះត្រូវបានកម្លាំងនគរបាលប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណីនៅឯគេហដ្ឋាន៕សារ៉េត