ភ្នំពេញ៖ជនសង្ស័យម្នាក់ជាកម្មករក្នុងហាងផឹកសុីមួយកន្លែងធ្វើសកម្មភាពលួចយកម៉ូតូពីថៅកែបាន៤ថ្ងៃទើបកម្លាំងនគរបាលចាប់ឃាត់ខ្លួនយកមកផ្ដន្ទាទោស ខណៈដែលម្ចាស់ហាងទុកកូនសោរលើតុប្រហេះ។ហេតុការណ៍នេះបានកើតឡើងកាលពីថ្ងៃទី១១ខែសីហាឆ្នាំ២០១៧ម៉ោង១៩និង០០នាទីយប់នៅមុខ ហាងម្លប់ដូង (ផ្ទះលេខ៨៤២) ផ្លូវជាតិលេខ១ ភូមិជ្រោយអំពិល១សង្កាត់ក្បាលកោះខណ្ឌច្បារអំពៅ។
ជនរងគ្រោះឈ្មោះ ទេស មុន្នី ភេទប្រុស អាយុ៣០ឆ្នាំ ជនជាតិខ្មែរ មុខរបរ លក់ដូរ ស្នាក់នៅផ្ទះកើតហេតុខាងលើ។ចំណែកឯជនសង្ស័យឈ្មោះ ក្រូច ចិត្រ្តា ហៅ ស្រស់ ភេទប្រុស អាយុ១៧ឆ្នាំ ជនជាតិខ្មែរ មុខរបរ រត់តុ ស្នាក់នៅផ្ទះកើតហេតុខាងលើ។
តាមប្រភពពត៌មានពីជនរងគ្រោះបានអោយដឹងថា កាលពីថ្ងៃទី១១ខែសីហាឆ្នាំ២០១៧ ម៉ោង១៩និង០០នាទីយប់ខ្លួន(ជនរងគ្រោះ)បានទុកម៉ូតូម៉ាកហុងដាZoomerX ពណ៌ស ពាក់ស្លាក លេខភ្នំពេញ ១FO-៦៩២៧ លេខតួ ៥០៣៨០១៧ លេខម៉ាសុីន ០០៣៨០១៧ នៅចំណុចកើតហេតុ និងទុកកូនសោរម៉ូតូ នៅលើតុក្រោមផ្ទះ។ ពេលនោះជនសង្ស័យក៏បានលួចយកកូនសោរទៅចាក់ម៉ូតូជិះគេចខ្លួន។រហូតដល់ថ្ងៃទី ១៥ខែសីហាឆ្នាំ២០១៧ ម៉ោង១៣និង០០នាទីរសៀលខ្លួនឃើញជនសង្ស័យកំពុងជិះម៉ូតូ នៅភូមិបឹងព្រលិត ឃុំជ្រៃលាស់ ស្រុកពញាឮ ខេត្តកណ្តាល ក៏រាយការណ៍ប្រាប់កម្លាំងនគរបាលស្រុកពញាឮឃាត់ខ្លួនព្រមទាំងដកហូតបានម៉ូតូមកវិញ។រួចមកកម្លាំងនគរបាលស្រុកពញ្ញាឮប្រគល់ជូនកម្លាំងនគរបាលខណ្ឌច្បារអំពៅដើម្បីចាត់ការបន្ត៕សារ៉េត