ភ្នំពេញ: នគរបាលប៉ុស្តិ៍ស្ទឹងមានជ័យហាក់ដូចជាវិលក្បុង ខណៈមនុស្ស៤នាក់ទៅដាក់ពាក្យបណ្តឹងយកត្រូវរៀងៗខ្លួនក្នុងករណីពីរផ្សេងគ្នា បន្ទាប់ពីពួកគេបង្កហិង្សាដាក់គ្នារហូតមានរបួសស្នាមក្នុងជម្លោះដណ្តើមម៉ូយម៉ូតូឌុប ហើយពួកគេជជែកយ៉ាងតឹងសរសៃក ទោះបីសមត្ថកិច្ចរារាំងមិនឲ្យរំខានក្នុងការសាកសួរម្តងម្នាក់ក៏ដោយ ។
ហេតុការណ៍ឈ្លោះប្រកែកគ្នារហូតមានការប្រើអំពើហិង្សារបួសស្នាមទាំងសងខាងនេះបានកើតឡើងកាលពីវេលាម៉ោង៨និង៣០នាទីព្រឹក ថ្ងៃ២៤ ខែសីហា ឆ្នាំ២០១៧ នៅចំណុចមុខច្រមុះជ្រូកស្ទឹងមានជ័យ ផ្លូវមុនីរ៉េត សង្កាត់ស្ទឹងមានជ័យ ខណ្ឌមានជ័យ ដែលជាកន្លែងក្រុមម៉ូតូឌុប និងរ៉ឺម៉កម៉ូតូរង់ចាំម៉ូយ ។
ប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះមានឈ្មោះ ណ ណាត ភេទប្រុស អាយុ៣៧ឆ្នាំ មុខរបររត់ម៉ូតូឌុប ស្នាក់នៅបន្ទប់ជួលក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានប្តឹងឈ្មោះ គា អាយុ៣៧ឆ្នាំ មុខរត់ម៉ូតូឌុប ថា ជាជនបង្កផ្តើមចេញពីការដណ្តើមម៉ូយគ្នាវាយគាត់ឲ្យបែកក្បាល ។
ប្រភពដដែលបានឲ្យដឹងទៀតថា ខណ:ពេលដែលសមត្ថកិច្ចនគរបាលប៉ុស្តិ៍ស្ទឹងមានជ័យកំពុងតែសរសេរពាក្យបណ្តឹងគូទំនាស់ទី១មិនទាន់ចប់សព្វគ្រប់ផងនោះ ស្រាប់តែប៉ុន្មាននាទីក្រោយមកមានគូទំនាស់មួយគូទៀតដឹកគ្នាមកប្តឹងសមត្ថកិច្ចយកត្រូវរៀងខ្លួន ដោយមានអ្នកខ្លះបែកក្បាលហូរឈាម និងអ្នកខ្លះប៉ង់ស៊ីម៉ង់ក្បាល និងជជែកគ្នាយ៉ាងតឹងសរសៃក ធ្វើឲ្យមានភាពរញេរញ៉ៃពេញប៉ុស្តិ៍នគរបាលស្ទឹងមានជ័យ ដោយភាគីម្ខាងៗមកដាក់ពាក្យបណ្តឹងរកត្រូវរៀងៗខ្លួន ធ្វើឲ្យសមត្ថកិច្ចឈឺក្បាលទាំងព្រឹកតែម្តង ។
យ៉ាងណាសមត្ថកិច្ចបានត្រឹមធ្វើកំណត់ហេតុ និងសួរចម្លើយមនុស្សទាំង៤នាក់នោះ រួចបញ្ជូនទៅកាន់អធិការដ្ឋាននគរបាល ខណ្ឌមានជ័យ ដើម្បីចាត់ការតាមនិតិវិធីប៉ុណ្ណោះ៕ អូន ធួក
