ភ្នំពេញ៖ បុរសម្នាក់ជិះម៉ូតូមកពីលេងនៅម្ដាយត្រូវរថយន្ដមិនស្គាល់ម៉ាកបើកកៀរដួលត្រូវរថយន្តមិនស្គាល់ម៉ាកមួយគ្រឿងទៀតបើកមកពីក្រោយកិនពាក់កណ្ដាលខ្លួនស្លាប់ភ្លាមៗនៅនិងកន្លែង យ៉ាងអាណោចអាធម៌ហើយរថយន្តបង្កបើករត់គេចខ្លួនបាត់សម្រោល ។ហេតុការណ៍គ្រោះថ្នាក់ចរាចរណ៍ដ៏គួរអោយរន្ធត់ខាងលើនេះបានកេីតឡេីងនៅវេលាម៉ោង១០និង២០នាទីយប់ ថ្ងៃទី២៥ ខែសីហា ឆ្នាំ២០១៧ នៅតាមបណ្ដោយផ្លូវ៣០ម៉ែត្រ ស្ថិតក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
យុវជនរងគ្រោះដែលស្លាប់បាត់បង់ជីវិតខាងលើ ត្រូវបានបងស្រីបង្កើតប្រាប់ឲ្យដឹងថាឈ្មោះ ឈឹម ចាន់រះ អាយុ២៤ឆ្នាំ មុខរបរធ្វើស្រែ រស់នៅភូមិតាង៉ក ឃុំរំចេក ស្រុកព្រះស្ដេច ខេត្តព្រៃវែង និងជាម្ចាស់ម៉ូតូម៉ាកហុងដាឌ្រីម ស៊េរី២០១៥ ពណ៌ខ្មៅ ពាក់ស្លាកលេខភ្នំពេញ1DC-4336 ។
តាមសម្ដីបងស្រីយុវជនរងគ្រោះបានប្រាប់ទាំងទឹកភ្នែកថា មុនពេលកើតហេតុ ប្អូនរបស់គាត់(ជាជនរងគ្រោះ)បានមកពីលេងផ្ទះម្ដាយបង្កើតនៅឯគីឡូម៉ែត្រលេខ៦ ក្នុងខណ្ឌឬស្សីកែវ ហើយបំណងមកលេងនិងសម្រាកផ្ទះគាត់(ផ្ទះបងស្រី)នៅម្ដុំផ្លូវវេងស្រេង ក្នុងសង្កាត់ចោមចៅ ដោយជនរងគ្រោះធ្វើដំណើរឆ្លងកាត់ផ្លូវកើតហេតុខាងលើក៏ជួបគ្រោះថ្នាក់ចរាចរណ៍រថយន្តមិនស្គាល់ម៉ាកបើកបុកម៉ូតូនិងកិនយុវជនរងគ្រោះស្លាប់នៅនិងកន្លែងតែម្ដង ។
តាមប្រភពព័ត៌មានពីកន្លែងកើតហេតុបានអោយដឹងថា យុវជនរងគ្រោះបានជិះម៉ូតូតែម្នាក់ឯង ធ្វើដំណើរតាមបណ្ដោយផ្លូវកើតហេតុខាងលើ ហើយត្រូវបានរថយន្តមួយគ្រឿងមិនស្គាល់ម៉ាក បើកទៅប៉ះម៉ូតូជនរងគ្រោះកំពុងធ្វើដំណើរពីក្រោយបណ្ដាលឲ្យដួល ធ្វើឲ្យម៉ូតូខ្ទាតទៅកណ្ដាលទ្រូងផ្លូវ។ចំណែកយុវជនរងគ្រោះខ្ទាតមកកណ្ដាលផ្លូវចំហៀងម្ខាង ស្របពេលនោះក៏មានរថយន្តមិនស្គាល់ម៉ាកមួយគ្រឿងទៀតបើកមកពីក្រោយជ្រុលចង្កូតមកកិនពាក់កណ្ដាលខ្លួនជនរងគ្រោះកំពុងតែដួល បណ្ដាលឲ្យគ្រាំគ្រឿងក្នុង ស្លាប់ភ្លាមៗនៅនិងកន្លែងកើតហេតុ ។
ក្រោយកើតហេតុភ្លាមៗ រថយន្តបង្កទាំងពីរគ្រឿងបានបើកគេចខ្លួនបាត់អស់ ដោយពុំមានអ្នកដេញតាមឡើយ ។ បន្ទាប់មកប្រជាពលរដ្ឋបានទំនាក់ទំនងទៅសាច់ញាតិជនរងគ្រោះបានចុះមកដល់កន្លែងកើតហេតុ ឃើញមានបងប្អូនបង្កើតនិងម្ដាយបង្កើតមកយំត្រសោបឱបកូននិងប្អូនទាំងក្ដីអាឡោះអាឡៃ ។
បច្ចុប្បន្ននេះកម្លាំងនគរបាលមូលដ្ឋានបានធ្វើឯកសារប្រគល់សពជនរងគ្រោះ រួមទាំងម៉ូតូ ឲ្យទៅសាច់ញាតិក្រុមគ្រួសារដឹកយកទៅស្រុកកំណើតចាត់ចែង និងធ្វើបុណ្យតាមប្រពៃណី ៕បញ្ញា