គ្រោះថ្នាក់ចរាចរណ៍៥២លើកស្លាប់មនុស្ស២៦នាក់ របួស៩០នាក់ ខូចយានយន្តជិត១០០គ្រឿងនៅ៣ថ្ងៃចុងក្រោយនៃបុណ្យភ្ជុំបិណ្ឌ

0
169

ភ្នំពេញៈ នាយកដ្ឋាននគរបាលចរាចរណ៍សណ្តាប់ធ្នាប់​សាធារណៈនៃអគ្គស្នងការដ្ឋាននគរបាលជាតិបានចេញរបាយការណ៍ឲ្យដឹងថា  នាថ្ងៃទី២១ ខែកញ្ញា ឆ្នាំ២០១៧បានឲ្យដឹងថាក្នុងរយៈពេលត្រឹមតែ៣ថ្ងៃចុងក្រោយ នៃពិធីបុណ្យភ្ជុំបិណ្ឌ គ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន៥២លើក ស្លាប់មនុស្ស២៦នាក់ ក្នុងនោះមាននារី៤នាក់ និងរបួសធ្ងន់ស្រាល៩០នាក់។ តួលេខនេះបើប្រៀបធៀបរយៈពេលដូចគ្នា កាលពីឆ្នាំ២០១៦កន្លងទៅ មានការកើនឡើង១០ករណី ខណៈចំនួនអ្នកស្លាប់ និងរបួសកើនឡើងដល់៣១នាក់។ ក្នុងរបាយការណ៍បូកសរុបគ្រោះថ្នាក់ចរាចរណ៍អំឡុងបុណ្យភ្ជុំបិណ្ឌ៣ថ្ងៃចុងក្រោយ នេះឃើញថា បានកើតឡើងនៅចន្លោះពីថ្ងៃទី១៩ ដល់ថ្ងៃទី២១ ខែកញ្ញា ឆ្នាំ២០១៧ ក្រៅពីមានមនុស្សស្លាប់និងរបួសដូចខាងលើ ក៏នៅមានខូចខាតយានយន្តជាច្រើនដូចជាម៉ូតូខូច៧៣គ្រឿង រថយន្តតូច២២គ្រឿង រថយន្តធំ១គ្រឿងនិង យានយន្តផ្សេងៗ១គ្រឿង។

របាយការណ៍ដដែលបន្តថា កត្តាដែលនាំឲ្យកើនមានគ្រោះថ្នាក់ចរាចរណ៍រយៈពេល៣ថ្ងៃនេះ ដោយសារបើកបរក្នុង ល្បឿនលឿន១៣លើក, ស្រវឹង៨លើក, ប្រជែង ៥លើក, មិនគោរពសិទ្ធិ៩លើក, មិនប្រកាន់ស្តាំ៧លើក, បត់គ្រោះថ្នាក់៩លើក និងកត្តាយានយន្ត១លើក។

ក្នុងនោះដែររបាយការណ៍បានបង្ហាញថានៅ ខេត្តព្រៃវែង កើតមានគ្រោះថ្នាក់​ចរាចរណ៍​៤លើក ស្លាប់៧នាក់ របួស៦នាក់, កំពង់ស្ពឺ កើតឡើង២លើក ស្លាប់៤នាក់, កណ្តាល កើតឡើង៤លើក ស្លាប់៤នាក់, កំពង់ចាម កើតឡើង៦លើក ស្លាប់៣នាក់ របួស៧នាក់, កំពង់ធំ កើតឡើង៣លើក ស្លាប់២នាក់ របួស៣នាក់, តាកែវ កើតឡើង៣លើក ស្លាប់ម្នាក់ របួស៦នាក់ និងខេត្តព្រះសីហនុ កើតចំនួន២លើក ស្លាប់១នាក់ របួស៣នាក់៕អូន ធួក

LEAVE A REPLY

Please enter your comment!
Please enter your name here