ភ្នំពេញ៖ក្រុមជនសង្ស័យ២នាក់បានធ្វើសកម្មភាពឆក់កាបូបពី ស្ត្រីមានផ្ទៃពោះ ៤ខែជិះម៉ូតូម្នាក់ឯង បណ្តាលអោយដួលរងរបួសជើង តែឆក់កាបូបមិនបានសម្រេច ហេតុការណ៍នេះនៅវេលាម៉ោង ៩និង៣០នាទី នៅតាមបណ្តោយផ្លូវសហ័ពន្ធរ៉ុស្សី ទល់មុខផ្សារបាយ័ន ស្ថិតក្នុងសង្កាត់ស្រះចក ខណ្ឌដូនពេញ ។
ស្ត្រីរងគ្រោះ ឈ្មោះ សានស្រីនុច អាយុ ២៥ឆ្នាំ ស្នាក់នៅម្តុំផ្សារសំណង់១២ ខណ្ឌទួលគោក ។
តាមប្រភពព័ត៌មានពីស្ដ្រីរងគ្រោះបានប្រាប់ឲ្យដឹងថា មុនពេលកើតហេតុរូបគាត់បានជិះម៉ូតូមួយគ្រឿងម៉ាក today ពណ៌ក្រហមដែលគ្មានពាក់ស្លាកលេខធ្វើដំណើរចេញមកពីពិនិត្យផ្ទៃពោះក្នុងគោលដៅពីកើតមកលិច។លុះមកដល់មុខផ្សារបាយ័នបានលេចមុខជនសង្ស័យ២នាក់ជិះម៉ូតូមួយគ្រឿងដោយមិនចាំម៉ាកមកពីក្រោយធ្វើសកម្មភាពឆក់កាបូបពីស្រ្ដីរងគ្រោះតែមិនបានសម្រេចបណ្ដាលឲ្យដួលម៉ូតូរងរបួសជើងរីឯជនសង្ស័យបានជិះគេចខ្លួនបាត់ស្រមោលតែម្ដង ។
ក្រោយកើតហេតុប្តីស្ត្រីរងគ្រោះបានជិះម៉ូតូឌុបមកទទួលស្ត្រីជាប្រពន្ធទៅលាងរបួស និងនាំគាត់ទៅផ្ទះវិញមិនរំខានដល់សមត្ថកិច្ច៕បញ្ញា