ភ្នំពេញៈ ដោយសារតែខ្លាចសមត្ថកិច្ចដោះលែងជនសង្ស័យដែលទើបចាប់បាន ធ្វើឲ្យក្រុមអាជីវករនៅផ្សារគីឡូម៉ែត្រលេខ៦ជាង ៣០នាក់ បាននាំគ្នាមកប៉ុស្តិ៍នគរបាល បន្ទាប់ពីទទួលដំណឹងថា ប្រជាការពារសង្កាត់គីឡូម៉ែត្រលេខ៦ ចាប់ឃាត់ខ្លួនជនសង្ស័យ ២នាក់ ដែលតែងតែដើរធ្វើសកម្មភាពគាស់តូបតាមផ្សារ និងផ្ទះបងប្អូនប្រជាពលរដ្ឋជារៀងរាល់យប់ជាញឹកញាប់តែចាប់មិនបានទើបតែចាប់បានពេលនេះ ។
ហេតុការណ៍នេះ បានកើតឡើងកាលពីវេលាម៉ោង ២និង៤០នាទីយប់លឺ ថ្ងៃទី២៧ ខែវិចិ្ឆកា ឆ្នាំ២០១៦ ដែលនៅត្រង់ចំណុចមុខអគ្គីសនី ផ្លូវបេតុង ក្រុម២ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។
ជនសង្ស័យទាំង២នាក់ ទី១ឈ្មោះ វន សុខ ភេទប្រុស អាយុ ១៦ឆ្នាំ មុខរបរមិនពិតប្រាកដ (ធ្លាប់ជាប់គុកពីបទលួច) និងជនសង្ស័យទី២ឈ្មោះ វន ចំរើន ភេទប្រុស អាយុ២៣ឆ្នាំ មុខរបរមិនពិតប្រាកដ។ ពួកគេមានទីលំនៅភូមិក្រោលគោ ក្រុម៥ សង្កាត់គីឡូម៉ែត្រលេខ៦ ខណ្ឌឬស្សីកែវ។
ប្រភពពីប្រជាការពារសង្កាត់គីឡូលេខ៦ បានឲ្យដឹងថា នៅយប់ថ្ងៃកើតហេតុ ពួកគាត់បាននាំគ្នាជិះល្បាតនៅក្នុងមូលដ្ឋាន ដើម្បីការពារសន្តិសុខជូនបងប្អូនប្រជាពលរដ្ឋ ក៏បានប្រទះឃើញជនសង្ស័យ២នាក់ ដោយមានការសង្ស័យ ទើបកម្លាំងប្រការពារសង្កាត់បានដើរតាមពីក្រោយរហូតដល់ចំណុចមុខអគ្គីសនី ផ្លូវបេតុង ក៏បានចាប់ឃាត់ខ្លួនជនសង្ស័យទាំង២នាក់ រួចឆែកឆេររកឃើញប្រដាប់ចង្កេះសោ ហើយក៏ត្រូវនាំខ្លួនទៅកាន់ប៉ុស្តិ៍នគរបាលរដ្ឋបាលគីឡូម៉ែត្រលេខ៦ ។
ក្រោយពីទទួលបានដំណឹងថា ប្រជាការពារសង្កាត់ចាប់ឃាត់ខ្លួនជនសង្ស័យ២នាក់ ដែលតែងតែធ្វើសកម្មភាពគាស់តូប ហើយនិងផ្ទះប្រជាពលរដ្ឋនោះ។ នៅព្រឹកថ្ងៃទី២៨ ខែវិចិ្ឆកានេះ ក្រុមអាជីវករជាង៣០នាក់បាននាំគ្នាមកមុខប៉ុស្តិ៍នគរបាល ដើម្បីចង់ដឹងថា តើសមត្ថកិច្ចដាក់ទោសទៅលើជនសង្ស័យទាំង២នាក់នេះឬក៏ដោះលែងទៅវិញ ។
ទោះយ៉ាងណា ក្រុមអាជីវករទាំងអស់បានធ្វើការសំណូមពរទៅដល់សមត្ថកិច្ច មេត្តាជួយដាក់ទោសលើជនសង្ស័យទាំង២នាក់នេះផង។ ព្រោះថា ជនសង្ស័យទាំង ២នាក់នេះ តែងតែដើរគាស់តូប និងផ្ទះបងប្អូនប្រជាពលរដ្ឋរាល់យប់។ សមត្ថកិច្ចសន្យាថាអនុវត្តតាមច្បាប់មិនដោះលែងជនសង្ស័យពីរនាក់នេះទេ ៕ អូន ធួក
